बागलुङ, ५ चैत – जिल्लाको तमानखोला गाउँपालिका–१ बोंगादोभानकी सुशिला कामी दिनभर गाउँपालिकाले खटाएको ठाउँमा काम गर्छिन् । न्यून आय भएको परिवार धान्न धौ धौ भएकी सुशिलाले काम पाएपछि अहिले परिवार पाल्न सजिलो भएको छ । उनले प्रधानमन्त्री रोजगार कार्यक्रमअन्तर्गत गाउँमै काम पाएकी छन् ।
दिनभरी काम गरेपछि साँझ उनले नेपाल सरकारले तोकेको पारिश्रमिक पाउँछिन् । महिनामा एकै पटक आउने भएपनि सुशिलाले दिनदिनै गर्ने कमाइको आधारमा खर्च गर्न र उधारो चलाउन सहज भएको छ । कहिले विद्यालयको खेलमैदान निर्माण त कहिले गोरेटो बाटो निर्माणका काममा खटिने सुशिला र उनका साथीहरु पहिरोले क्षति पु¥याएका सरकारी संरचनामा फलामे तारजाली लगाउने, खानेपानीको पाइपका लागि लाइन खन्ने काम पनि गर्छन् ।
एकतर्फ सामाजिक काम गर्न पाएकोमा उनीहरु दंग छन् भने अर्कोतर्फ गाउँमा ज्याला मजदुरी गर्दाभन्दा धेरै पारिश्रमिक पाउँछन् । तमानखोला गाउँपालिकाले विद्यालयमा खेलमैदान, पर्खाल लगाउने, गोरेटोबाटो बनाउने, खानेपानीका संरचना बनाउने र चौतारी, पोखरीको संरक्षणलगायतका काममा प्रधानमन्त्री रोजगार कार्यक्रममा सहभागिहरुलाई लगाउने गरेको छ ।
तमानखोला गाउँपालिका-२ कटेरी गाउँमा रहेको जनज्योति आधारभुत विद्यालयको खेलमैदान बनिरहेको छ । खेलमैदान निर्माणका लागि विद्यालयले जग्गा मात्रै देखाइदिएको हो । बाँकी काम प्रधानमन्त्री रोजगार कार्यक्रममा सहभागिले गरिरहेका छन् । यो त एउटा उदाहरण मात्रै हो । तमानखोला गाउँपालिकाले प्रधानमन्त्री रोजगार कार्यक्रमबाट यस्तै कयौं कामहरु गरेको छ ।
‘हामिले मजदुर आवश्यक हुने ठाउँमा रोजगार कार्यक्रममा सहभागिलाई लगाउने गरेका छौं’, तमानखोला गाउँपालिकाका रोजगार संयोजक चेतलाल चालिसेले भने ‘रोजगारीमा सहभागिहरु निकै खुसीका साथ काम गरिरहेका छन् ।’
तमानखोला गाउँपालिकामा ६ सय ६८ जना बेरोजगारको सूचिमा सूचीकृत छन् । त्यसमध्ये ४ सय जनाले यो वर्ष पनि काम गरिरहेका छन् । ८० जना बेरोजगारहरुलाई १ सय दिनका दरले काम लगाउनेगरी नेपाल सरकारले दिएको ससर्त अनुदानमा गाउँपालिकाले ४ सय जनालाई काम लगाइरहेको चालिसेले बताए ।
‘बेरोजगारको सूचिमा रहेका मध्ये अधिकांशको अवस्था उस्तै छ, सरकारले बनाएको मापदण्डमा ४ सय जनानै पर्छन्’m उनले भने,‘सबैलाई सहभागि बनाउँदा ६०÷७० दिनका दरले काम पाउँछन्, ६ महिना खान नपुग्ने सबैलाई काम पाउँदा घर चलाउन सहज हुन्छ ।’
कार्यक्रममा सहभागिले दिनको ५ सय ७७ रुपैयाँका दरले पारीश्रमीक पाउँछन् । यो पारीश्रमिक तमानका गाउँमा ज्याला मजदुरी गर्दापाउने पारीश्रमिक भन्दा धेरै हो । जिल्लामा कायम भएको दररेट ८ सय ५ रुपैयाँ छ तर प्रधानमन्त्री रोजगार कार्यक्रमले तय गरेको दररेट अनुसार पारिश्रमिक दिने गरिएको उनले बताए ।
गाउँमा महिला र पुरुषमो पारिश्रमिक फरक÷फरक छ तर कार्यक्रममा सबैको समान पारिश्रमिक हुन्छ’, चालिसेले भने,‘समान कामको लागि समान ज्याला कायम गराउन कार्यक्रम प्रभावकारी बन्दैछ ।’ गाउँपालिकामा तीनै तहको सरकारका नजर नपुग्ने क्षेत्रमा रोजगार कार्यक्रमले सहयोग गरेको छ ।
