बागलुङ, २९ बैशाख– बागलुङको बडिगाड गाउँपालिकाका अध्यक्ष मेहरसिंह पाईजा र नेकपा एमालेको तर्फबाट अध्यक्षका उम्मेदवार राजन कुमार पाईजामाथि आक्रमण भएको छ । बुधबार राती एमालेको कार्यालयमा सुतिरहेको समयमा पाईजासहित छ जना एमाले कार्यकर्तामाथि आक्रमण भएको हो ।
नेपाली कांग्रेस वडिगाड गाउँपालिकाका उपसभापति अर्जुन कुमार पाईजासहित १५ जना युवाहरुको समुहले आक्रमण गर्दा मेहरसिंह पाईजा, राजनकुमार पाईजा, गणेश पाईजा, निमेश आचार्य, किरण सुनार र चन्द्र पाईजा घाईते भएको नेकपा एमाले वडिगाड गाउँ कमिटीका अध्यक्ष कमलराज आचार्यले बताए ।
उम्मेदवार राजनकुमार पाईजामाथि खुकुरी प्रहार गर्दा उनको हातमा गम्भिर चोट लागेको छ । युवा संघका कार्यकर्ता चन्द्र पाईजाको हात भाँचिएको छभने गणेश पाईजाको शनिबारका बिभिन्न भागमा चोट रहेको आचार्यले बताए । चन्द्र र गणेशको बुर्तिबाङ प्राथमिक स्वास्थ्य केन्द्रमा उपचार भैरहेको छ ।
घटनास्थलबाट प्रहरीले एक जनालाई नियन्त्रणमा लिएको जनाएको छ । ‘दुवै पक्ष झगडाका लागि लागेको भन्ने देखिन्छ, हामीले सोधपुछ र अनुसन्धानको काम गरिरहेका छौं’ प्रहरी उपरीक्षक दयानिधी ज्ञवालीले भने ‘चार वटा मोटरसाईकल पनि नियन्त्रणमा छन्, एक पक्षले घाईते भएको र अर्को पक्षले दुईजना कार्यकर्ता गायब गरेको भनेका छन् ।’
निर्वाचनका लागि मौन अबधि सुरु भएपछि आफ्ना काम सकेर पार्टी कार्यालय पुगेका उम्मेदवार र कार्यकर्तामाथि आक्रमण भएको भन्दै एमालेले भत्र्सना गरेको छ । बडिगाड गाउँ कमिटीका अध्यक्ष आचार्यले बिहिबार एक प्रेस बिज्ञप्ती जारी गदै घटनाको बिषयमा छानविन र दोषीमाथि कारवाहीको माग गरेका छन् ।
