मुस्ताङ, १२ मंसिर– जिल्लामा यसवर्ष ६ हजार ६ सय मेट्रिकटन स्याउ उत्पादन भएको छ । गत बर्षभन्दा १ हजार ३३ मेट्रिकटन बढी स्याउ उत्पादन भएको कृषि ज्ञान केन्द्र मुस्ताङले जनाएको हो ।
ज्ञान केन्द्रले किसानको बगंैचामा पुगेर स्याउको उत्पादन, बजारलगायतको सर्वेक्षण गरेको थियो । केन्द्रले क्रप कटिङ विधि र जिल्लाका स्थानीय स्याउ किसानसँग सोधपुछ गरी तथ्यांक तयार गरेको कार्यालय प्रमुख प्रकाश बस्ताकोटीले जानकारी दिए ।
२०७९÷०८० मा जिल्लाको कुल ५ सय ८० हेक्टर जमिनमा लगाइएको स्याउ बोटमा उक्त परिमाणमा स्याउ उत्पादन भएको हो । पाँचवटै स्थानीय तहमा १ हजार ४ सय ७५ हेक्टर जमिनमा स्याउ खेती गरिएको छ । ५ सय ८० हेक्टर जमिनको उत्पादनशील स्याउ बगैंचाको क्रप कटिङ सर्वेक्षण गर्दा जिल्लामा प्रतिहेक्टर ११ दशमलव ३७ मेट्रिकटन स्याउ उत्पादन हुने आँकलन गरिएको प्रमुख बस्ताकोटीले बताए ।
यसैगरी जिल्लाको कुल स्याउ उत्पादनमध्ये यसवर्ष ४ सय ४० मेट्रिकटन उच्च घनत्व प्रविधिमा आधारित स्याउको उत्पादन भएको छ । मुस्ताङमा ३८ हेक्टर जमिनमा उच्च घनत्व प्रविधिमा आधारित स्याउ खेती गरिएको छ । केही वर्षयता मुस्ताङका किसान धमाधम परम्परागत जातका स्याउ छाडेर उच्च घनत्व प्रविधिमा आधारित स्याउ लगाइरहेका छन् । केन्द्रले स्याउ विशेष कार्यक्रमका साथै स्याउ ब्लक कार्यक्रम सञ्चालन गर्दै आइरहेको छ ।
