बागलुङ, १३ मंसिर – समानुपातिक मत परिणाम अनुसार बागलुङमा प्रतिनिधि सभातर्फ नेपाली कांग्रेस र प्रदेश सभातर्फ नेकपा एमालेले बढी मत पाएका छन् ।
२०७४ को निर्वाचनमा प्रतिनिधि सभा र प्रदेश सभा दुवैमा नेपाली कांग्रेसले बढी मत प्राप्त गरेको थियो । यस पटक कांग्रेसले प्रतिनिधि सभामा पहिलो स्थान प्राप्त गरेपनि प्रदेश सभामा भने एमालेले जितेको छ ।
जिल्ला निर्वाचन कार्यालय बागलुङका अनुसार प्रतिनिधि सभा (संघ)तर्फ नेपाली कांग्रेसले ३२ हजार ७ सय ७६ मत प्राप्त गर्दै पहिलो स्थान हासिल गरेको हो । नेपाली कांग्रेसले क्षेत्र नम्बर १ मा १६ हजार ४ सय ९३ र क्षेत्र नम्बर २ मा १६ हजार २ सय ८३ मत प्राप्त गरेको जिल्ला निर्वाचन कार्यालयले जनाएको छ ।
प्रतिनिधि सभातर्फ नेकपा एमालेले ३० हजार ८ सय ९६ मत प्राप्त गरेको छ । एमालेले क्षेत्र नम्बर १ मा १५ हजार ४ सय २८ र क्षेत्र नम्बर २ मा १५ हजार ४ सय ६८ मत प्राप्त गरेको छ । तेस्रो स्थानमा नेकपा माओवादी केन्द्रले ११ हजार २ सय ४ र चौथो स्थानमा राष्ट्रिय स्वतन्त्र पार्टीले ११ हजार ३३, पाँचौं स्थानमा रहेको राष्ट्रिय जनमोर्चाले ८ हजार ६ सय १६, छैठौं स्थानमा रहेको राप्रपाले १ हजार ३ सय ४३ मत र सातौं स्थानमा रहेको नेकपा (एकीकृत समाजवादी)ले ६ सय ४३ मत प्राप्त गरेको छ।
प्रदेश सभातर्फ भने नेकपा एमालेले धेरै मत प्राप्त गरेको छ । एमालेले प्रदेश सभातर्फ ३३ हजार १ सय ७१ मत प्राप्त गरेको छ। एमालेले क्षेत्र नम्बर १ मा १६ हजार ९ सय ६५ र क्षेत्र नम्बर २ मा १६ हजार २ सय ६ मत प्राप्त गर्दै पहिलो स्थानमा रहेको छ ।
प्रदेश सभातर्फ दोस्रो स्थानको नेपाली कांग्रेसले क्षेत्र नम्बर १ मा १६ हजार ५ सय ३७ र क्षेत्र नम्बर २ मा १४ हजार ५ सय ९८ मत गरी कुल ३१ हजार १ सय ३५ मत, तेस्रो स्थानमा रहेको नेकपा माओवादी केन्द्रले ११ हजार ९ सय ३० मत, चौथो स्थानमा रहेको राष्ट्रिय जनमोर्चाले ११ हजार ९ सय ३० मत, पाँचौं स्थानमा रहेको राप्रपाले १ हजार ७ सय ८३ मत र छैठौं स्थानमा रहेको नेकपा (एकीकृत समाजवादी)ले ८ सय २ मत प्राप्त गरेको छ ।
आम निर्वाचन २०७४ मा प्रतिनिधिसभा र प्रदेशसभा दुवैमा नेपाली कांग्रेस पहिलो, नेकपा एमाले दोस्रो, राष्ट्रिय जनमोर्चा तेस्रो र नेकपा माओवादी केन्द्रले चौथो स्थान प्राप्त गरेको थिए ।
