बागलुङ, १५ पुस– ‘एक निर्वाचन क्षेत्र, एक रणनीतिक सडक’अन्तर्गत बागलुङका दुई निर्वाचन क्षेत्रका सडक कालोपत्रे गर्न धमाधम पूर्वाधारको काम भइरहेको छ ।
बागलुङको गलकोट नगरपालिका हरिचौरदेखि बडिगाड, निसीखोलाहुँदै प्यूठान जोड्ने निर्वाचन क्षेत्र रणनीतिक सडक र बागलुङ बजारको अदालत चौपारीहुँदै सिगाना, चापाखर्क, बरेङ शान्तिपुर जोड्ने सडकमा पुर्वाधार निर्माणको काम भइरहेको हो ।
क्षेत्र नम्बर २ अन्तर्गतको गलकोट हरिचौरदेखि बडिगाड, निसीखोलाहुँदै प्यूठान जोड्नेसडक कालोपत्रेका लागि आवश्यक स्तरोन्नतिको काम धमाधम भइरहेको गलकोट नगरपालिका वडा नं. ७ का वडाध्यक्ष राजबहादुर थापाले बताए ।
सडक डिभिजन कार्यालय बागलुङका अनुसार हरिचौरदेखि प्यूठान जोड्ने सडक ३० करोड ४३ लाखको ठेक्कामार्फत आयोजनाको काम अगाडि बढाएको हो । उक्त बजेटबाट आवश्यक पूर्वाधारसहित आठ किलोमिटर सडक कालोपत्रे गरिने निर्माण कम्पनी लोपूर्ण कन्सट्रक्सन प्रालिका प्रबन्धक अमिन लामाले बताए ।
यस्तै, बागलुङ बजारदेखि सिगानासम्मको सडक कालोपत्रेका लागि सडक चौडा पार्ने, ग्याबिन लगाउने र नाली काट्ने काम भइरहेको सडक कालोपत्रेको जिम्मा पाएको कर्ण विल्र्डसका इन्जिनियर विपिन क्षेत्रीले बताए । सम्झौता अगावै सडक कालोपत्रे सक्ने लक्ष्यका साथ काम भईरहेको निर्माण कम्पनीले दाबी गरेको छ ।
बागलुङका दुईवटै रणनीतिक सडकमा धमाधम काम भइरहेको सडक डिभिजन कार्यालयका सूचना अधिकारी इन्जिनियर कृष्णबहादुर खड्काले जानकारी दिए । तोकिएको समयभित्रै कालोपत्रे सक्ने गरी निर्माण कम्पनीले कामलाई तीव्रता दिएपछि प्रभावित क्षेत्रका स्थानीय खुसी भएका छन् ।
