बागलुङ, १९ पुस– जिल्लाको बहुचर्चित ‘रुपा गौतम हत्याकाण्ड’को बिषयमा निष्पक्ष छानविन र दोषीलाई कारवाही गर्न ‘आम युवा टिम’ले गृहमन्त्रीको ध्यानाकर्षण गराएको छ । आठ बर्षदेखि छानविनमै रहेको हत्याकाण्डमा संलग्नको खोजी, पहिचान र कारवाहीका लागि युवाहरुको समुह ‘आम युवा टिम’ले गृहमन्त्री रवि लामिछानेको ध्यानाकर्षण गराएको हो ।
‘आम युवा टिम’का सदस्य बागलुङका युवा सोम शर्माको नेतृत्वमा गृह मन्त्रालय पुगेको समुहले गृहमन्त्रीलाई ध्यानाकर्षण पत्र बुझाएको छ । ध्यानाकर्षण पत्रमा घटनालाई उच्च प्राथमिकतामा राखेर निष्पक्ष अनुसन्धानको निम्ति निर्देशन दिन भनिएको छ ।
‘बागलुङको अन्सल्भ्ड केशको रुपमा रहेको २०७१ भाद्र १२ गतेको रुपा गौतम हत्याकाण्डको तुरुन्त निष्पक्ष छानबिन गर्न आग्रह गर्दै उच्चस्तरिय पहलस्वरुप गृहमन्त्रीलाई ध्यानाकर्षण पत्र बुझाएका छौं । र, तत्कालै सम्बन्धित अधिकारीलाई यस सन्दर्भमा निर्देशनात्मक आदेश समेत दिनुभएको छ ।’ गृहमन्त्रीलाई भेटेपछि शर्माले लेखेका छन् ‘अब लुकेर र ढुक्कको साथमा बसेका ती अपराधी छिटै बाहिर आउनेछन् र बागलुङले न्याय पाउनेछ ।’
गौतमको हरितालिका तिजको दिनमा बागलुङ नगरपालिका वडा नम्बर ३ स्थित बोक्सेको खाल्डोमा दिउँसैै घांटी रेटेर बिभत्स हत्या भएको थियो । काठेखोला गाउँपालिका–६ निवासी गौतम तीजमा माईती पुगेर फर्किने क्रममा हत्या भएको थियो । हत्या पश्चात निरन्तर अनुसन्धान गरिरहेको प्रहरीले हत्यामा संलग्नहरुको पहिचान भैनसकेको बताउँदै आएको छ ।
