बागलुङ, २१ पुस– उच्च अदालत पोखरा बागलुङ इजलासको सुविधासम्पन्न भवन निर्माण थालिएपछि उच्च अदालतको सेवा बागलुङ जिल्ला अदातलबाट दिन थालिएको छ ।
२०७२ सालको भूकम्पले कमजोर बनाएको भवन भत्काएर नयाँ भवन निर्माण गर्न थालिएपछि उच्च अदालतको सेवा बागलुङ नगरपालिका वडा नम्बर २ रुद्रेपिपलमा रहेको जिल्ला अदालतको भवनबाट दिन थालिएको उच्च अदालतका रजिष्ट्रार नेत्रप्रसाद भुसालले जानकारी दिए ।
‘न्याय सम्पादनमा असर नपर्ने गरी उच्च अदालतको सेवा एक महिनादेखि जिल्ला अदालतबाट दिन थालेका छौँ, उच्च अदालतका रजिष्टार नेत्रप्रसाद भूसालले भन्नुभयो, ‘आवास भने भाडाको घरमा पु¥याएका छौ ।’ नागरिकले एउटै भवनबाट उच्च अदालत र जिल्ला अदालतको सेवा पाएको भूसालको भनाई छ ।
रजिष्ट्रार भुसालका अनुसार ३० महिनाभित्रै उच्च अदालतको भवन पुननिर्माण सक्ने गरी धमाधम काम भइरहेको छ । अदालतको भवन तथा आवास निर्माणका लागि ५७ करोड ४२ लाखमा श्यामसुन्दर पशुपति जेभीले ठेक्कामार्फत काम थालेको हो ।
उच्च अदालतको भवन पुननिर्माण गर्न बजेट अभाव हुँदा ७ वर्षपछि मात्रै थालिएको हो । उच्च अदालतको भवन र सामूहिक आवास, अथितिगृह लगायत संरचना एकैसाथ निर्माण थालिएको मुख्य न्यायाधिश कृष्ण गिरीले जानकारी दिए ।
भूकम्पपछि जिर्ण भवन प्राविधिक दृष्टिले निकै खतरापूर्ण भएपनि सात वर्षदेखि जोखिम मोलेरै न्याय सम्पादन भइरहेको थियो । दुईवटा इजलास रहेको उच्च अदालतमा नयाँ भवन निर्माणसँगै छवटा इजलास कक्ष हुनेछन् ।
नयाँ निर्माण हुने भवन प्रविधि, अपाङ्गतामैत्री र भूकम्प प्रतिरोधी हुने सघन सहरी तथा भवन निर्माण कार्यालय बागलुङका प्रमुख सुनिता श्रेष्ठले जानकारी दिइन् । अन्डरग्राउण्डसहित साढे छ तलाको भवनमा विद्युतीय लिफ्टको समेत व्यवस्था छ ।
