पर्वत, ७ माघ– जिल्लाको पैयुँ गाउँपालिकाले बाँदर नियन्त्रण गर्न बस्ती आसपासका रुख र झाडी सफा गर्ने अभियान थालेको छ । बाँदर प्रकोप न्यूनीकरणका साथै बस्तीका संरचनाको सुरक्षाका लागि रुख काट्न थालिएको गाउँपालिकाले जनाएको छ ।
‘पालिकाका सबैजसो वडामा बाँदरको बिगबिगी बढेपछि नियन्त्रण गर्न रुख र झाडी सफा गर्ने अभियान थालिएको हो’ गाउँपालिकाका अध्यक्ष तोरण मल्ल ठकुरी ‘राज’ले भने, ‘बस्ती र खेतीयोग्य जमिनबाट ८० मिटर आसपासका रुख कटान गरिने छ ।’
बढ्दो बाँदर आतंकले कृषकले उत्पादन गरेको बालीनाली र मान्छेलाई समेत क्षति पुग्ने गरेको छ । बसाइसराई कम भएको तथा जनसंख्या वृद्धिदर हुँदा गाउँमा चहलपहल बढेपनि अहिले तिनै गाउँहरू सुनसान हँुदा जंगली जनावरको आतंक बढेको ठकुरीले बताए ।
रूख काट्ने अभियानका लागि पालिकाले प्रत्येक वडामा एक÷एक वटा रुख काट्ने मेसिन र १५ दिनका लागि दुई÷दुई जना कामदार खटाएको छ । बाँदरले बर्षामा मकै सखाप पार्छ भने हिउँदमा धान, सुन्तला, फलफूल, तरकारी, अलैँची तहसनहस पार्ने गरेको छ ।
गाउँपालिकाले निर्णय गरेपछि वडा कार्यलयहरुले निर्णय कार्यान्वयनका लागि रुख काट्ने अभियानलाई तीव्रता दिईरहेका छन् । पैयुँ गाउँपालिका टकलाकका वडाध्यक्ष मीन प्रसाद न्यौपानेले गाउँ जंगलले ढाकिएर बाँदर र आक्रामक वन्यजन्तुको जोखिम बढ्दै गइरहेकोले पालिकाको निर्णयअनुसार बस्ती आसपासका रुख हटाउन थालिएको बताए ।
