बागलुङ, १२ फागुन– चिल्ड्रेन लाइफ बोर्डिङ स्कुल बागलुङको २३ औं वार्षिकोत्सव तथा अभिभावक दिवश सम्पन्न भएको छ । वार्षिकोत्सव मूल समारोहको उद्घाटन गर्दै बागलुङ नगरपालिकाका प्रमुख बसन्तकुमार श्रेष्ठले समयअनुसार शिक्षामा सुधार गर्नुपर्ने बताए ।
आत्मनिर्भर शिक्षाका लागि बिद्यालयहरुले पहल गर्नुपर्ने सुझाव दिँदै श्रेष्ठले पछिल्लो समय जागिर खानका लागि मात्रै बिदेश जाने पद्दतीभन्दा उत्पादनको क्षेत्रमा लाग्ने जनशक्ती चाहिएको धारणा व्यक्त गरे ।
अभिभावक संघका अध्यक्ष केवी रानामगर, अभिभावक हेमराज पौडेल, शिक्षक दिपेन्द्र न्यौपाने, बिद्यार्थीहरु प्रमिस केसी र आस्था पौडेललगायतले बोलेको कार्यक्रममा प्रधानाध्यापक नवराज श्रेष्ठले प्रगती प्रतिवेदन प्रस्तुत गरेका थिए ।
बिद्यालय व्यवस्थापन समितिका अध्यक्ष श्रीधर कंडेलको अध्यक्षता, उपाध्यक्ष उशा पौडेलको स्वागत र शिक्षक नारायण पौडेलको संचालनमा सम्पन्न कार्यक्रममा बिद्यार्थीले विभिन्न गीत संगीत र अतिरिक्त क्रियाकलाप प्रस्तुत गरेका थिए ।
यसैबीच, चिल्ड्रेन लाइफ बोडिङ स्कुलले आइएसओ चिन्ह तथा मान्यता पाएको छ । बिभिन्न ५ संस्थागत रुपमा भएको अनुगमन मूल्यांकनपछि गुणस्तर व्यवस्थापन प्रमाणिकरण गर्ने बेलायतको संस्थाले विद्यालयलाई प्रमाणचिन्ह प्रदान गरेको हो ।
वार्षिकोत्सवमा कुँडुलेस्थित मुक्तिनाथ बेद विद्याश्रमका संचालक ऋषि प्रपन्नाचार्यले आइएसओ चिन्ह तथा लोगो सार्वजनिक गरेका थिए ।
आइएसओ चिन्ह पाएको बिद्यालयबाट उत्तिर्ण हुने बिद्यार्थीले अन्तराष्ट्रिय बजारमा रोजगारी पाउन सहज हुने बिद्यालयका प्रधानाध्यापक नवराज श्रेष्ठले चिन्ह पाएपछि नियमित गरिने अनुगमनका सूचक अद्यावधिक गर्ने काम चुनौतीको भएको बताए ।
