म्याग्दी, २० फागुन– जिल्लाको अन्नपूर्ण गाउँपालिका वडा नं. ४ स्थित नयाँ पर्यटकीय गन्तव्य नारच्याङ झरना जोड्ने पदमार्ग निर्माण भएको छ ।
झरना अवलोकन गर्न आउने पर्यटकलाई आवतजावतमा सहजताका लागि गण्डकी प्रदेशको उद्योग, पर्यटन, वन तथा वातावरण मन्त्रालयअन्तर्गतको उद्योग तथा पर्यटन कार्यालय म्याग्दीको सहयोगमा पदमार्ग निर्माण गरिएको हो ।
उपभोक्ता समितिका अध्यक्ष चन्द्रप्रकाश फगामीले कार्यालयको सहयोगमा भिरालो पाखोको उकालोमा एक सय ५० मिटर रेलिङसहितको पदमार्ग निर्माण गरिएको जानकारी दिए । ‘पालिकाको दश लाख विनियोजन गरी पदमार्ग निर्माण थालिएको हो, यसमा स्थानीयले १० प्रतिशत श्रमदान गरेका छन्’ फगामीले भने ।
नारच्याङ गाउँदेखि झरनासम्म थप एक किलोमिटर पदमार्ग निर्माण आवश्यक भएको फगामीको भनाई छ । उकालो बाटोमा व्यवस्थित पदमार्ग नहुँदा चिप्लिएर लड्ने जोखिम थियो । पदमार्ग निर्माणलाई पूर्णता दिन योजनालाई निरन्तरता दिइने वडाध्यक्ष लोकबहादुर फगामीले जानकारी दिए ।
बेनी–जोमसोम सडकको नागढुंगादेखि पाँच मिनेट सवारीसाधन र आधा घन्टा पैदल हिँडेर झरना भएको स्थानमा पुग्न सकिन्छ । झरना अवलोकनका लागि आउने पर्यटकको सुविधाका लागि नारच्याङका सात घरमा घरबास ‘होमस्टे’ सञ्चालन गरिएको छ ।
