बागलुङ, १३ चैत्र– जिल्लाका स्थानीय तहले विनियोजन गरेको बजेट कार्यान्वयनमा उपभोक्ता समिति नहुँदा कठिनाइ भएको छ । गाउँमा युवा जनशक्ति अभावका कारण समिति गठन हुन नसक्दा योजना कार्यान्वयनका लागि कठिनाइ भएको हो ।
वर्षाअघि काम सक्नेगरी काठेखोला गाउँपालिका ६ नं. वडा कार्यालयले प्रजातन्त्रदय प्राविमा शौचालय निर्माण र अमृतपानी आधारभूत विद्यालयमा शौचालय, सुरक्षा पर्खाल, खानेपानीका योजना निर्माणका लागि बजेट विनियोजन गरेपनि उपभोक्ता समिति गठन नहुँदा निर्माण अघि बढ्न सकेको छैन ।
उपभोक्ता समितिमा बस्ने जनशक्तिको अभावका कारण दुवै विद्यालयका योजना अघि बढ्न नसकेको वडाध्यक्ष बृहस्पति शर्माले बताए । एउटा योजनामा सात जना समिति र तीन जना अनुगमन समिति गरी १० जना उपभोक्ता आवश्यक पर्दछ ।
एउटा योजनामा बसेको उपभोक्ता योजना सम्पन्न नभएसम्म अर्काे समितिमा बस्न नपाउने प्रावधान छ । वडाले चालु आर्थिक वर्षमा साना–ठूला गरी ४९ योजना तयार गरेको छ । वडा, गाउँपालिका, प्रदेश र संघ सरकारका अधिकांश कार्यक्रम उपभोक्ता समितिमार्फत गर्नुपर्ने प्रकृतिका छन् ।
शिक्षक, कर्मचारी र राजनीतिक दलमा आवद्ध पदाधिकारी उपभोक्ता समितिमा बस्न पाउँदैनन् । समितिको काम गर्दा प्राविधिक ज्ञान आवश्यक पर्ने तथा व्यक्तिगत खर्च हुने भएकाले उपभोक्ताले दायित्व बोक्न नचाहने प्रवृत्ति बढेको शर्माले बताए ।
