म्याग्दी, १ बैशाख– काठमाडौंबाट मुस्ताङको जोमसोम जाँदै गरेको घोडाघोडी कम्पनीको बा ४ ख ९६७४ नम्बरको यात्रुबाहक बस दुर्घटनामा परी घाइते भएका चारै जना ट्रेकिङ मजदुरहरुको पहिचान खुलेको छ ।
काठमाडौंको सिटो समिट कम्पनीबाट अष्ट्रेलियन पर्यटकलाई उपल्लो मुस्ताङहुँदै थोरङ्लापास गरी बेंसीसहर निक्लन हिँडेका मजदुरहरु सवार बस बेनी–जोमसोम सडकको तिप्ल्याङ खण्डअन्तर्गत अन्नपूर्ण गाउँपालिका वडा नं. १ तिप्याङ नजिकै शुक्रबार बिहान दुर्घटनामा परेको थियो ।
दुर्घटनामा परी ओखलढुंगा जिल्लाको मलङ गाउँपालिका वडा नं. ७ की मिङ्मा शेर्पा, खिचिरेम्बा गाउँपालिका वडा नं. १ की छम्जी शेर्पा, सिन्धुपाल्चोक जिल्लाको पाँचपखीथान गाउँपालिका वडा नं. ६ का मिङ्मार तामाङ र लिसिम्वोपहर गाउँपालिका वडा नं. १ का पूर्ण लामा घाइते भएका थिए ।
बेनी अस्पतालमा उपचाररत घाइतेहरुलाई टाउको, खुट्टा, हात र ढाडमा बढी चोट लागेको छ । घाइतेहरुको अवस्था खतरामुक्त रहेको अस्पतालले जनाएको छ । उक्त बसमा सवार अन्य यात्रु भने अर्को बस व्यवस्था गरी गन्तव्यतर्फ लागेको जिल्ला प्रहरी कार्यालय म्याग्दीले जनाएको छ । बसमा २१ जना सवार थिए ।
