प्रतिकात्मक तस्बिर
म्याग्दी, ७ बैशाख– म्याग्दीको बेनीदेखि रत्नेचौरहुँदै बागलुङ जिल्ला जोड्ने बेनी–रत्नेचौर–बागलुङ सडकमा एक साताका सवारी आवागमन बन्द गरिएको छ ।
बेनी–बाग्लुङ सडकअन्तर्गत बेनी नगरपालिका–१ र २ मा पर्ने रत्नेचौर–खबरा खण्ड कालोपत्रे गर्न वैशाख १२ गतेसम्मका लागि यातायात पूर्णरूपमा बन्द रहने बेनी नगरपालिकाले जनाएको छ ।
सडक खण्डको करिब साढे ३ किलोमिटर सडक कालोपत्रे गर्ने कार्य शुरु भएको पूर्वाधार विकास कार्यालय म्याग्दीका कार्यालय प्रमुख गुरुदत्त अधिकारीले बताए । एक सातासम्म यातायातका साधन बेनी–मालढुंगाहुँदै बागलुङ आउजाउ गर्ने पूर्वाधार कार्यालयले सुझाएको छ ।
१४ किलोमिटर बेनी–बागलुङ सडक खण्डमध्ये नौ किलोमिटर सडक म्याग्दी र साढे चार किमप् सडक बागलुङमा पर्छ । बागलुङ क्षेत्रमा पर्ने सडक कालोपत्रे भइसकेको छ भने म्याग्दी क्षेत्रको सडकमध्ये साढे तीन किमी सडक कालोपत्रे गर्न बाँकी थियो । रत्नेचौरबाट बेनीको खबरासम्मको उक्त सडक कालोपत्रे गर्ने काम २०७४ मा १३ करोड १५ लाखको लागतमा कालोपत्रेको ठेक्का देव एण्ड सायर बीएन जेभीले लिएको थियो ।
