पोखरा, २३ बैशाख– पोखरा स्पोर्टस् अवार्डको सातौं संस्करणको उदीयमान खेलाडीमा क्रिकेटका सुवास भण्डारी घोषित भएका छन् । फुटबलका सुमित श्रेष्ठ र भलिबलका रवि केसीलाई पछि पार्दै बागलुङका भण्डारी उदीयमान खेलाडी घोषित भएका हुन् ।
१९ वर्षीय सुवास भण्डारी नेपाली राष्ट्रिय यु–१९ का पहिलो रोजाइका अलराउन्डर हुन् भने गण्डकी प्रदेशको यु–१९ टिम कप्तानसमेत हुन् । नेपाललाई यु–१९ विश्वकप छनोटमा पु¥याउन भण्डारीको ठूलो योगदान थियो । नेपालले क्रिकेटको यु १९ विश्वकप खेल्दैछ ।
भण्डारीले यु–१९ विश्वकप छनोटका लागि खेलका पाँच खेलमा कुल ७ विकेट लिए । भण्डारीले सिंगापुरविरुद्ध १० ओभरमा २३ रन खर्चेर २ विकेट, हङकङविरुद्ध १० ओभरमा १० रन खर्चेर २ विकेट, मलेसियाविरुद्ध ९ ओभरमा ३० रन खर्चेर १ विकेट र युएईविरुद्ध १० ओभरमा ३४ रन खर्चेर २ विकेट लिएका थिए ।
बागलुङमा जन्मिएका भण्डारी कास्कीमा नै रहेर क्रिकेट खेलिरहेका थिए । राष्ट्रिय टिममा पर्नुअघि भएको प्रदेशस्तरीय छनोट खेलमा ६ खेल्दा १४ विकेट लिएका थिए । उनले ६ खेलमा १२४ रन पनि बनाएका थिए ।
