म्याग्दी, २६ बैशाख– बेनी अस्पतालले फिजियोथेरापी सेवा सुरु गरेको छ । सरकारी अस्पतालमा पहिलो पटक फिजियोथेरापी सेवा उपलब्ध भएपछि बिरामीलाई राहत मिलेको छ ।
बेनी अस्पतालका निमित्त प्रमुख डा. अञ्जु थापाले आइतबारदेखि फिजियोथेरापी सेवा सञ्चालनमा आएको जानकारी दिइन् । फिजियोथेरापीबाट हड्डी खिइएको, नसा च्यापिएको, माँसपेशी दुख्ने, झमझमाउने, लुलो हुने, प्यारालाइसिस, जन्मजात असाधारण भएका बालबालिका, हातखुट्टा नचल्ने सम्बन्धी रोगको उपचार हुनेछ ।
अस्पतालमा चार शैयाको फिजियोथेरापी कक्ष स्थापना गरिएको छ । अस्पतालमा दैनिक पाँचदेखि १५ जनासम्म फिजियोथेरापी गर्नुपर्ने बिरामी आउने गरेका छन् । गण्डकी प्रदेश सरकारले विनियोजन गरेको ८ लाख बजेटबाट फिजियोथेरापी सेवाका लागि आवश्यक उपकरण खरिद गरिएको थियो ।
अस्पतालले फिजियोथेरापिष्ट चिकित्सक कान्तीलक्ष्मी देवी कटुवाललाई नियुक्त गरेको छ । पछिल्लो समय बिरामीको संख्या बढेसँगै फिजियोथेरापी सेवा विस्तार गरिएको बेनी अस्पताल व्यवस्थापन समितिका अध्यक्ष ज्ञानेन्द्र सुवेदीले जानकारी दिए ।
यसअघि फिजियोथेरापी सेवा लिन म्याग्दीका बासिन्दालाई पोखरा, बागलुङ, काठमाडौँ धाउनुपर्ने बाध्यता थियो । बेनीमै सेवा पाउने भएपछि जिल्ला बाहिर जाँदा हुने समय र रकमको बचत हुने छ । अस्पतालले छिट्टै मानसिक रोग उपचार सेवा सुरु गर्ने तयारी गरेको अध्यक्ष सुवेदीले बताए ।
