काठमाडौं, ९ जेठ– घरेलु भूमिमा जारी एनएससी–काभा अन्तर्राष्ट्रिय महिला भलिबल प्रतियोगितामा लगातार दोस्रो जित निकाल्दै नेपाल सेमिफाइनल प्रवेश गरेको छ ।
राष्ट्रिय खेलकुद परिषद (राखेप) को कभर्डहलमा मंगलबार भएको खेलमा बंगलादेशलाई हराउँदै नेपाल एक खेल अगावै सेमिफाइनल प्रवेश गरेको हो । घरेलु समर्थकको साथ पाएको नेपालले बंगलादेशलाई ३–० को सोझो सेटमा हराएको हो । नेपालले बंगलादेशलाई २५–१०,२५–८ र २५–९ ले हराएको हो ।
जितसँगै समूह ‘ए’ को नेपालले ६ अंक जोडेको छ । समान ६ अंक नै भएको भारत पनि यस समूहबाट सेमिफाइनल प्रवेश गरेको छ । दुई खेलमा जितबिहिन बंगलादेश र किर्गिस्तान भने समूहचरणबाट बाहिरिएका छन् । अब नेपालले तेस्रो खेलमा बुधबार भारतको सामना गर्नेछ । भारत र नेपालको खेलबाट समूहको विजेता र उपविजेताको टुंगो लाग्नेछ ।
प्रतियोगिताअन्तर्गत मंगलबार भारत र काजकिस्तानले जित निकालेका छन् । मंगलबारको पहिलो खेलमा भारतले किर्गिस्तानलाई ३–० को सोझो सेटमा हराएको हो । भारतले किर्गिस्तानलाई २५–१७,२५–८ र २५–८ ले हराएको हो ।
