बागलुङ, २ असार– सार्वजनिक यातायातमा समायोजन भएको भाडादर कार्यान्वयन थालिएको छ । गत मंगलबार सार्वजनिक यातायात भाडा दर निर्धारण समितिले जिल्लाभित्र चल्ने बस तथा जीपको भाडादर समायोजन गराएको थियो ।
असार १ गतेदेखि कार्यान्वयन हुनेगरी समायोजन गरिएको भाडादर कार्यान्वयनका लागि जिल्ला प्रशासन, यातायात व्यवस्था र ट्राफिक प्रहरी कार्यालयले सक्रियता देखाएका छन् । शुक्रबार बिहान बागलुङ बजारदेखि गलकोट–बुर्तिबाङ चल्ने जीप तथा बसमा समायोजन भएको भाडादर टाँस गरी कार्यान्वयनका लागि निर्देशन दिईएको प्रमुख जिल्ला अधिकारी रोशनी कुमारी श्रेष्ठले बताईन् ।
‘२०७६ सालदेखि बागलुङमा भाडादर समायोजन भएको थिएन्, हामीले सर्वसाधारण र यातायात व्यवसायीलाई मर्का नपर्नेगरी भाडादर समायोजन गरेका छौं’ प्रजिअ श्रेष्ठले भनिन् ‘कार्यान्वयन र अनुगमन गर्ने सबैको जिम्मेबारी हो ।’ उनले तोकिएभन्दा बढी भाडा लिनेलाई कारवाही गर्न ट्राफिक प्रहरीलाई निर्देशन दिईन् ।
सवारीसाधानमा भाडादर टाँसका लागि प्रजिअ श्रेष्ठ, यातायात व्यवस्था कार्यालयका प्रमुख पारसिंह थापा, प्रहरी प्रमुख योगेन्द्र कुमार खड्का, ट्राफिक प्रमुख मिनबहादुर खड्का, उपभोक्ता मञ्चका अध्यक्ष शैलेन्द्र कुमार श्रेष्ठलगायत सहभागि थिए ।
पछिल्लो समय कच्ची सडक पक्की बनेको र इन्धनको भाडा घटेकोले बागलुङको ग्रामीण तहमा जाने आउने भाडा घटाउनुपर्ने माग उठेको थियो । समायोजन भएको भाडादर असार १ गतेदेखि लागू भएको छ ।
यातायात व्यवसायी, प्रहरी, यातायात व्यवस्था, ट्राफिक, पूर्वाधार विकास कार्यालय, यातायात मजदुर व्यवसायी संघ र अन्य सरोकारवालाको बैठकले भाडादर समायोजन गरेकाले कार्यान्वयनमा समस्या नहुने यातायात व्यवस्था कार्यालयका प्रमुख पारसिंह थापाले बताए । ‘अधिकांस स्थानमा पुग्ने भाडादर थोरै भएपनि घटेको छ’ उनले भने, ‘सडकको अवस्था, इन्धनको मूल्य लगायतको अवस्था हेरेर बैज्ञानिक भाडादर कायम गरिएको छ ।’
