बागलुङ, २० असोज– दलित आन्दोलनका अगुवा भगत सर्वजित विश्वकर्माको जन्मस्थल र उनको योगदान तथा राष्ट्रिय दलित आयोगका संस्थापक पदमसिंह विश्वकर्माको कर्मको स्मृति आउने गरी बागलुङको जैमिनीमा राष्ट्रिय दलित संग्राहलय बनाइने भएको छ ।
शुक्रबार दलित संग्राहलय तथा अध्ययन अनुसन्धान केन्द्र स्थापनार्थ प्रारम्भिक अबधारणा प्रस्तुतीकरण र छलफल कार्यक्रममार्फत संग्राहलय अभियानको थालनी गरियो । संग्राहलयको स्थापनाको दिनको रुपमा शुक्रबारलाई लिने गरी ३ बुँदे जैमिनी घोषणासमेत गरिएको छ ।
शुक्रबार जैमिनीको कुश्मीसेरामा आयोजित अभियानको थालनी कार्यक्रममा जिल्लाका अन्य पालिकाका प्रमुख तथा उपप्रमुख, कार्यपालिका सदस्यहरु, दलित समुदायका अगुवा, अधिकारकर्मी र राजनीतिक दलका अगुवाको उपस्थितिमा दलित संग्राहलय निर्माण गरेर देशकै नाम बागलुङबाट लेखिनुपर्ने धारणा राखे ।
जैमिनी नगरपालिका वडा नं.. ७ को जैदीमा संग्राहलय बनाइने भएको छ । वडा अध्यक्ष केन्द्रबहादुर रसाइलीको अगुवाईमा केही समय अघिदेखि संग्राहलय बनाउने बहस चलेको थियो । गत चैतमा नगरपालिकाले आफ्नो अंगको रुपमा कार्यपालिकाले निर्णय गरेपछि गत असारमा नीति तथा कार्यक्रम र बजेटमा पनि संग्राहलयको योजना समावेश थियो । यो अभिायनलाई मुर्त रुप दिन शुक्रबारदेखि औपचारिक कामको थालनी भएको हो ।
कार्यक्रममा दलित संग्राहलय बनाउने मात्र नभइ दलित समुदायका विभिन्न जातिमा भएको सीप पुस्तान्तरण गर्ने र संरक्षण गर्ने बिषयमा पनि सबै एकजुट भएका छन् । दलित र गैर दलित बीचको बिभेद अन्त्य गर्ने, संग्राहलयलाई सबैले साझा र अपनत्व लिने समेत घोषणामा उल्लेख छ ।
जैमिनीमा पुगेका जनप्रतिनिधिहरुले देशकै पहिलो दलित संग्राहलय बन्न लागेकोले आबस्यक सहयोग गर्ने प्रतिवद्धता समेत जनाए । उनीहरुले दलीतहरु सीपमा धनी भएकोले हरेक नागरिकले उनीहरुको सीपबिना जीवन चलाउन अप्ठ्यारो परेको इतिहास संग्राहलयले सम्झाउने बताए । संग्राहलयलाई अध्ययन अनुसन्धान केन्द्रको रुपमा पनि विकास गरिने बताइएको छ ।
