बागलुङ, २० असोज– जिल्लाको बरेङ गाउँपालिकाले सेवा निवृत्त शिक्षकहरुलाई बिदाईसहित सम्मान तथा उत्कृष्ट नतिजा ल्याउने विद्यार्थीहरुलाई पुरस्कृत गरेको छ ।
गाउँपालिकाले शिक्षण पेशामा संलग्न भई अनिवार्य सेवा निवृत्त भएका ६ जना शिक्षकलाई सम्मान तथा बिदाइ गरेको हो भने शैक्षिक सत्र २०७९ मा कक्षा ८, १० र १२ मा उत्कृष्ट जिपिए प्राप्त गर्ने विद्यार्थीहरुलाई पुरस्कृत गरिएको हो । पालिकाका बिद्यालयको छनौट सूचकअनुसार जिम्मेवारपूर्वक सूचक पुरा गरेका विद्यालयको स्तर छनौट गरी स्तरका आधारमा विद्यालयलाई प्रमाणपत्र वितरण गरिएको छ ।
कार्यक्रममा अनिवार्य सेवा निवृत्त भएका शिक्षकहरु महेन्द्र मावि सुखौराका दुर्गाप्रसाद शर्मा, भृकुटी माविका रुपनारायण शर्मा, साग्दी प्राविका पुर्णबहादुर न्यौपाने, हुग्दिशिर प्राविका जगबहादुर काउचालाई गाउँपालिका अध्यक्ष कृष्णप्रसाद शर्मा र प्रमुख प्रशासकिय अधिकृत जितबहादुर रानाले सम्मानसहित बिदाई गरेका थिए ।
त्यसैगरी, शारदा माविका रामजीप्रसाद न्यौपाने र भृकुटी माविका रामप्रसाद पौड्याललाई मायाको चिनो र प्रमाणपत्रले सम्मानसहित बिदाई गरिएको थियो भने शैक्षिक सत्र २०७९ मा कक्षा ८, १० र १२ मा उत्कृष्ट जिपिए प्राप्त गर्ने ३६ जना विद्यार्थीलाई पुरस्कृत गरिएको पालिकाले जनाएको छ ।
