बागलुङ, २० कात्तिक– भुकम्पले क्षति पुगेको पश्चिम नेपालका जाजरकोट र रुकुम पश्चिममा बागलुङबाट पहिलो चरणमा कम्तिमा ५० लाखको राहत पठाइने भएको छ ।
जिल्ला बिपद व्यवस्थापन समितिमा सहभागि जनप्रतिनिधिले उक्त निर्णय गरेका हुन् भने अन्य संघसंस्थाको सहयोग पनि व्यवस्थापन गरेर पठाइने निर्णय गरेको समितिका अध्यक्ष तथा प्रमुख जिल्ला अधिकारी खगेन्द्रप्रसाद रिजालले जानकारी दिए ।
बैठकमा उपस्थित सबैले आ–आफ्नो क्षेत्रबाट सहयोग गर्ने प्रतिवद्धता जनाएका थिए । संकलित सहयोगलाई जिल्ला प्रशासनमार्फत बितरण गर्ने निर्णय भएको हो ।
बागलुङका ४ नगरपालिकाले ६ लाख ३० हजार र ६ गाउँपालिकाले ४ लाख २० हजारका दरले गरी ५० लाख रुपैयाँ सहयोग गर्ने निर्णय भएको बागलुङ नगरपालिकाका प्रमुख बसन्तकुमार श्रेष्ठले बताए ।
उक्त रकममध्ये नगद रकम प्रधानमन्त्री राहत कोषमा जम्मा गर्ने तथा अत्यावस्यक सामाग्री खरिद गरेर पीडितलाई बितरण गर्ने तयारी भएको श्रेष्ठले जानकारी दिनुभयो । राहत बितरणका लागि जिल्लाको टोली त्यसतर्फ सोमबार जानेछ ।
बागलुङ उद्योग बाणिज्य संघको नेतृत्वमा संघसस्थाले पनि राहत सामाग्री संकलन गरिरहेका छन् । ‘हामीले न्यानो कपडा संकलन गरिरहेका छौं, बितरणका लागि टिम बनाएर पठाउने तयारी छ’ उनले भने, ‘पीडितको आवस्यक पु¥याउन प्रशासनले समन्वय गर्नुपर्छ ।’
बैठकमै पुग्नुभएका सिवाईसी नेपालका अध्यक्ष चण्डीप्रसाद शर्माले ५० हजार र बागलुङ कालीका भगवती गुठी व्यवस्थापन समितिले १ लाख दिने अध्यक्ष कुमार खड्काले जानकारी दिए ।
