बागलुङ, २२ फागुन– जिल्लाको गलकोट नगरपालिका वडा नं. ९ स्थित अम्मरबसेकी बेलकुमारी गौतमको हत्यामा संलग्न सोही गाउँका इन्द्रबहादुर विकलाई प्रहरीले सार्वजनिक गरेको छ ।
फागुन १९ गते राती ६५ वर्षीया गौतमको शव घरको पूर्व पाण्डुकेसरी वनको गोरेटो बाटोदेखि अन्दाजी ६० मिटर तल भिरमा फेला परेको थियो ।
मृतावस्थामा फेला परेकी गौतमको गहना लुटिएको देखेपछि लडेर नभई हत्या भएको आशंकामा प्रहरीले अनुसन्धान अगाडि बढाएको थियो । अनुसन्धानको क्रममा विकले हत्या गरेको पुष्टि भएपछि प्रहरीले उनलाई आइतबार सार्वजनिक गरेको हो ।
गलकोट नगरपालिका वडा नं. ९ चुँदारा टोल बस्ने ४३ वर्षीय इन्द्रबहादुर विकले गौतमको हत्या गरी गहरगहनासमेत लुटी भिरबाट खसालेको अनुसन्धानका क्रममा पाइएको जिल्ला प्रहरी कार्यालय बागलुङका सूचना अधिकारी तथा प्रहरी नायब उपरीक्षक मदन केसीले जानकारी दिए ।
