म्याग्दी, २९ फागुन– जिल्लाको रणनीतिक महत्वको बेनी–दरबाङ सडक आयोजनाको तेस्रो लाम्पाटा–दरवाङ खण्डका ठेकेदार १० महिनापछि काममा फर्किएका छन् । २०७९ वैशाखदेखि रोकिएको म्याग्दीको लाइफलाइन मानिएको सो सडक निर्माणको काम सुरु भएको हो ।
गण्डकी प्रदेशको एक निर्वाचन क्षेत्र एक सडक कार्यक्रमअन्तर्गत पूर्वाधार विकास कार्यालय म्याग्दीमार्फत सञ्चालित सडक निर्माणमा भएको ढिलाइले यात्रुलाई सास्ती भएको थियो । ठेकेदार कम्पनी बिरुवा–क्याराभानका आधिकारिक प्रतिनिधि सोमनाथ थकालीले रणवाङमा नाली र पर्खाल निर्माणको काम तीव्रगतिका साथ भइरहेको बताए ।
मंगला गाउँपालिकाको लाम्पाटाबाट मालिकाको केन्द्र दरवाङसम्मको आठ किलोमिटर सडक कालोपत्रे गर्न २०७६ जेठ ३१ गते बिरुवा–क्याराभान जेभी र पूर्वाधार विकास कार्यालय म्याग्दीबीच २२ करोड ५७ लाख ९ सय ३२ मा ठेक्का सम्झौता भएको थियो ।
२०७८ जेठमा सकिनुपर्ने सडक निर्माणको भौतिक प्रगति ५५ प्रतिशत छ । आगामी २०८० असारसम्म म्याद थपिएको पूर्वाधार विकास कार्यालयका प्रमुख गुरुदत्त अधिकारीले बताए । ‘पर्याप्त मजदुर, उपकरण परिचालन गरेर सडक निर्माणलाई तीव्रता दिन ताकेता गरेका छौँ’ अधिकारीले भने । सो खण्डमा बाङ्गेपहिरो क्षेत्र जोखियुक्त छ ।
ताकेता र दबाबपछि १० महिनादेखि रोकिएको काम सुरु भएपछि अधुरो, अधकल्चो हिलाम्मे र धुलाम्मे सडकमा जोखिमपूर्ण यात्रा गर्नुपर्ने बाध्यता हट्ने आशा गरेको मंगला गाउँपालिका वडा नं. २ रणवाङका श्रीराम पौडेलले बताए । मंगला, मालिका र धवलागिरि गाउँपालिकालाई बेनीसँग जोड्ने यो सडक २०६३ मा मार्ग खुलेको थियो ।
