बागलुङमा सोमबारदेखि चैतेदशैं मेला सुरु भएको छ । बागलुङ कालिका भगवती गुठी व्यवस्थापन समितिले बेलाको आयोजना गरेको हो ।
गण्डकी प्रदेशकै ठूलो मेलाका रुपमा रहेको चैते दशैं मेलामा आयोजना गरिएको राष्ट्रिय भलिबल खेल प्रतियोगिताको बागलुङ नगरपालिकाका प्रमुख बसन्तकुमार श्रेष्ठले उद्घाटन गरेसँगै मेला औपचारिक रुपमा शुरू भएको हो ।
बागलुङ कालिका कुञ्ज परिसरमा सुरु भएको मेला चैतको १७ गतेसम्म सञ्चालन हुने गुठीका अध्यक्ष कुमार खड्काले जानकारी दिए ।
मेलाको उद्घाटन गर्दै नगरप्रमुख श्रेष्ठले मेला परम्परागत मात्रै नभई खेल, संगीत, उत्पादन र बजारीकरणका हिसाबले महत्वपूर्ण भएको बताए । बागलुङको ऐतिहासिक मेलालाई उपलव्धीमुलक बनाउनुपर्नेमा श्रेष्ठको जोड थियो ।
सोमबार उद्घाटन भएको भलिबल खेलमा १३ समुह सहभागी छन् । मेलामा बिबिध सांस्कृतिक तथा प्रतियोगितात्मक कार्यक्रम आयोजना गरिएको छभने मेलाको मुल समारोहको उद्घाटन चैत १५ गते चैत्राष्टमीको दिन हुने छ ।
यसैबीच, गण्डकी प्रदेश सरकारले चैते दसैँ पर्वका अवसरमा आगामी चैत १५ गते बुधबार सार्वजनिक बिदा दिने निर्णय गरेको छ । चैत्राष्टमीका बेला गण्डकीका शक्तिपीठ एवं देवीका मन्दिरमा भक्तजनको घुइँचो लाग्ने गर्छ ।
