बागलुङ, २२ चैत्र– ट्याक्टरमा च्यापिएर बागलुङको गलकोट नगरपालिका वडा नं. ११ रिघाको मनेवामा एक जनाको मृत्यु भएको छ ।
बडिगाड गाउँपालिका वडा नं. २ खर्बाङ बजारबाट गलकोटको हटियाबजार आउँदै गरेको ध १ त ६०९ नम्बरको ट्याक्टर मध्यपहाडी लोकमार्गबाट खस्दा च्यापिएर पूर्वी नवलपरासी घर भई मनेवा मामाघर आएका २३ वर्षीय दिपेश सलामीको मृत्यु भएको हो ।
ट्याक्टर लोकमार्गदेखि १५ मिटर तल होमबहादुर सिंजालीको घरमाथि खसेको थियो । घरमाथि खसेको ट्याक्टरले च्यापिँदा घाइते सलामीको र उद्धार गर्दागर्दै मुत्यु भएको प्रहरी कार्यालय बागलुङका सूचना अधिकारी प्रहरी निरीक्षक राजाराम खड्काले बताए ।
ट्याक्टर चालक गलकोट नगरपालिका–९ मा बस्दै आएका २३ वर्षीय डिक्सन पुनलाई नियन्त्रणमा लिएर थप अनुसन्धान गरिरहेको प्रहरीले जनाएको छ । ट्याक्टरले पार्किङ गरी राखिएको लु ६३ प ९०९ नम्बरको स्कुटर च्याप्दा क्षति भएको छ ।
