बागलुङ, ५ बैशाख– बागलुङको ताराखोला र म्याग्दीको मंगला गाउँपालिकाको सिमानामा अवस्थित तीनचुलेमा सडक र खानेपानी सुविधा पुग्यो, पर्यटन प्रर्वद्वनका लागि दुई पालिकाले सहकार्य गर्ने,
म्याग्दीको मंगला गाउँपालिका वडा नंं ५ र बागलुङको ताराखोला गाउँपालिका वडा नं. ४ को सिमानामा रहेको तीनचुलेमा सडक र खानेपानी सुविधा पुगेको छ ।
ताराखोला र गण्डकी प्रदेश सरकारको लगानीमा तिनचुलेमा सडक र लिफ्ट प्रविधिमार्फत खानेपानी पु¥याइएको हो । ताराखोला गाउँपालिका वडा नं. ४ का वडाध्यक्ष जीतबहादुर खत्रीले नागबेलीखोलादेखि दावाहँुदै तिनचुले जोड्ने पाँच किलोमिटर सडक निर्माण भएको जानकारी दिए ।
ताराखोला गाउँपालिकाको १० लाख र गण्डकी प्रदेश सरकारको ७५ लाख लगानीमा सडक निर्माण गरिएको खत्रीले बताउनुभयो । तीन वर्षअघि सुरु भएको सडक निर्माणकार्य सकिएसंगै दुई घण्टाको बाटो ३० मिनेटमा छोटिएको छ ।
यसैगरी, गण्डकी प्रदेश सरकारको २१ लाख लगानीमा पहाडको फेदीको मुहानबाट सौर्य ऊर्जाको प्रयोग गरि पानी तानेर तिनचुलेमा पु¥याइएको छ ।
ताराखेलाका अध्यक्ष धनबहादुर विक र मंगला गाउँपालिकाका उपाध्यक्ष पेमा अधिकारीले दुई पालिकाले सहकार्य गरेर धार्मिक महत्वसमेत बोकेको तिनचुलेमा पर्यटन प्रर्वद्वनका लागि काम गर्ने प्रतिबद्धता जनाएका छन् ।
चैतेथरीको मुहानबाट दुई हजार दुई सय मिटर लामो पाइपबाट लगेको पानी पाँच हजार लिटर क्षमताको ट्याङ्कीमा संकलन र दुई वटा धारा बनाइएको ताराखोलाको नवसिर्जना युवा क्लबका अध्यक्ष पूर्णभद्र निउरेले जानकारी दिए ।
२ हजार ९ सय ७० मिटरको उचाइमा रहेको तीनचुले प्रशस्त पर्यटकीय सम्भावना बोकेको ठाउँ भएपनि पूर्वाधार र प्रचार प्रसारको अभावमा ओझेलमा परेको छ । तीनचुलेबाट धौलागिरि, गुर्जा, अन्नपूर्ण, निलगिरी लगायतका हिमाल, बागलुङ र म्याग्दीको भूगोलका साथै सूर्योदयको मनमोहक दृश्य अवलोकन गर्न सकिन्छ ।
