बागलुङ, १६ बैशाख– बडिगाड गाउँपालिका वडा नम्बर ८ को भृकुटी माबिमा अध्ययन गर्ने बालबालिकालाई प्रदान गर्ने गरी अक्षयकोष स्थापना गरिएको छ ।
स्थानीय गंगाराम श्रीष पुनले १ लाख रुपैयाँको अक्षयकोष स्थापना गरि रकम समेत हस्तान्तरण गरेका छन् । यो बिद्यालयमा अध्ययन गर्न आउने बिद्यार्थीहरुले दैनिक चार घण्टासम्म पैदल हिड्नुपर्ने बाध्यता रहेको छ ।
दलीत, बिपन्न र मजदुरका बालबालिका पढ्ने भएकोले अक्षयकोषबाट अत्यावस्यक सामाग्री किनेर दिने व्यवस्था गरिएको प्रधानाध्यापक टेकप्रसाद श्रीषले बताए । ‘गंगाराम श्रीष पुन गरिब तथा जेहेन्दार छात्रवृत्ति कोष’मा आउने व्याजबाट छात्रवृत्ति दिईनेछ ।
शैक्षिक सामाग्री दिनेगरी बिद्यालयले कार्यविधि बनाउन लागेको छ । अक्षयकोष संचालनका लागि दानदाता, प्रधानाध्यापक र लेखापाल रहेको तीन सदस्य समिति गठन गरिएको छ । भौगोलिक कठिनाइको कारण समस्या भोगेका, बिपन्न परिवारमा भएकोलाई कोषले बिद्यार्थीमा पढ्ने हौसला थप्ने श्रीषले बताए ।
