म्याग्दी, २३ बैशाख– जिल्लाको अन्नपूर्ण गाउँपालिका वडा नं. ३ मा रहेको रुप्से झरना अवलोकन गर्ने क्रममा चिप्लिएर शनिबार एक जनाको मृत्यु भएको छ । काठमाडौँको बुढानीलकण्ठ नगरपालिका वडा नं. १ चपली बस्ने ५६ वर्षीय बसन्त भण्डारीको मृत्यु भएको जिल्ला प्रहरी कार्यालयले जनाएको छ ।
प्रहरी निरीक्षक किरण लामाका अनुसार, ढुंगाबाट चिप्लिएर ३० मिटर तल खस्दा टाउकोमा चोट लागेर गम्भीर घाइते हुनुभएका भण्डारीलाई जिल्ला अस्पताल बेनीमा ल्याउँदा चिकित्सकले मृत घोषणा गरेका थिए । बेनी–जोमसोम सडकअन्तर्गत पर्ने रुप्से झरना अवलोकन गर्ने क्रममा भण्डारीले टेकेको ढुंगाबाट चिप्लिएर खसेका थिए ।
