पोखरा, १० जेठ– राष्ट्रिय जनगणना २०७८ को तथ्यांकमा गण्डकी प्रदेशको जनसंख्या २४ लाख ६६ हजार ४ सय २७ रहेको छ । राष्ट्रिय जनगणना २०६८ मा गण्डकी प्रदेश अन्र्तगतका जिल्लाको जनसंख्या २४ लाख तीन हजार सात सय ५७ थियो ।
तथ्यांक कार्यालय कास्कीले मंगलबार पोखरामा एक कार्यक्रमको आयोजना गरी प्रदेशका ११ जिल्लामा रहेको जनसंख्याको तथ्यांक सार्वजनिक गरेको हो । गण्डकी प्रदेशका सामाजिक विकास तथा स्वास्थ्य मन्त्री सुशीला सिम्खडाले उक्त तथ्यांक सार्वजनिक गरेकी हुन् ।
राष्ट्रिय जनगणनाअनुसार गण्डकी प्रदेशका ११ जिल्लामा पुरुषको संख्या ११ लाख ७० हजार आठ सय ३३ अर्थात् ४७ दशमलब ४७ प्रतिशत छ भने महिलाको संख्या १२ लाख ९५ हजार पाँच सय ९४ अर्थात ५२ दशमलब ५३ प्रतिशत रहेको छ ।
जनगणनामा गण्डकी प्रदेशमा सबैभन्दा धेरै जनसंख्या कास्कीमा ६ लाख ५१ छ भने सबैभन्दा कम जनसंख्या मनाङमा पाँच हजार छ सय ५८ जना छ । जनधनत्वको हिसाबमा पनि कास्की जिल्लामा २ सय ९५ जना प्रतिवर्ग किलोमिटर र सबैभन्दा कम मनाङमा तीन जना प्रतिवर्ग किलोमिटरमा बसोबास गर्छन् ।
पछिल्लो मतगणनाको नजिता प्रस्तुत गर्दै राष्ट्रिय तथ्यांक कार्यालयका निर्देशक ढुण्डीराज लामिछानेले गण्डकीका ११ जिल्लामध्ये कास्कीमा वार्षिक जनसंख्या वृद्धिदर १.९० प्रतिशत र सबैभन्दा कम मनाङमा वार्षिक वृद्धिदर माइनस १.३९ प्रतिशत रहेको जानकारी दिऐ ।
