पर्वत, २१ असार– पहिराले कक्षाकोठा पुरिँदा पर्वतको एक विद्यालयमा पठनपाठनमा समस्या भएको छ । पर्वतको फलेवास नगरपालिका वडा नं. २ को थापाठानामा पहिरोले थापाठाना माध्यमिक विद्यालय दुई भवन पुरेपछि पठनपाठनमा समस्या भएको हो ।
असार १४ गते राती खसेको पहिरोले विद्यालयको तीन–तीनकोठे दुई भवनमा क्षति पु¥याएको विद्यालयका प्रधानाध्यापक विष्णु शर्माले जानकारी दिए । विद्यालय बिदा भएको समयमा पहिरो आएकाले मानवीय क्षति नभएको उनको भनाई छ ।
‘अहिले तत्कालका लागि केही गर्न सक्ने अवस्था छैन’ शर्माले भने, ‘बर्खायाम भएकाले अझै क्षति हुने सम्भावना छ ।’ उनले वर्षे बिदापछि कक्षा सञ्चालन हुने भएकाले वैकल्पिक कक्षाकोठाका लागि व्यवस्थापनमा समस्या हुने बताए ।
विद्यालयले जग्गा अभावका कारण दुई ठाउँमा आधारभूत तहको कक्षा सञ्चालन गरिरहेको छ । शर्माका अनुसार एउटा तीनकोठे भवन २०७५ सालमा ३१ लाख ५० हजार र अर्को भवन २०७६ सालमा १६ लाख २० हजारमा निर्माण गरिएको थियो ।
ठेकेदारको लापरबाहीका कारण विद्यालयमा क्षति पुगेको स्थानीयको भनाई छ । सडक निर्माणका क्रममा ठेकेदारले विद्यालयमाथि जथाभावी माटो फालेका कारण विद्यालयमा क्षति भएको स्थानीय अभिभावक राजेन्द्र क्षेत्रीको आरोप छ ।
विद्यालय व्यवस्थापन समितिका अध्यक्ष जितवहादुर थापा मगरले सडक निर्माणका क्रममा प्राविधिक त्रुटी भएको आशंका व्यक्त गरे । सडक निर्माणका क्रममा हामीले ठेकेदार र प्राविधिकलाई विद्यालयमाथि माटो राख्दा समस्या हुन्छ भनेर बारबार अनुरोध गरेको भएपनि सुनुवाई नभएको थापामगरको भनाई छ ।
