बागलुङ, १० असोज– जिल्ला प्रहरी कार्यालय बागलुङले कर्तव्य ज्यान मुद्दाका दुईजना फरार प्रतिबादीलाई पक्राउ गरेको छ ।
२०७७ चैत महिनाको १५ गते बागलुङको बडिगाड गाउँपालिकास्थित बल्देधुरीमा फागुपुर्णिमा मेलामा झडप हुँदा दुई जनाको हत्यामा संलग्न रहेको आरोपमा २९ बर्षिय तेजपाल भन्ने तेजेन्द्र छन्त्याल र १९ बर्षिय राजकुमार घर्तिलाई पक्राउ गरेको हो ।
दुई जनामध्ये २९ बर्षिय छन्त्याललाई २३ बर्ष ८ महिना २४ दिन र १९ बर्षिय घर्तीलाई १५ बर्ष २ महिना १८ दिन कैद सजाय तोकिएको जिल्ला प्रहरी कार्यालय बागलुङका प्रहरी नायब उपरिक्षक तथा सुचना अधिकारी मदन केसीले जानकारी दिए ।
फागुपुर्णिमाको अवसरमा बिवाद हुँदा निसीखोला–७ का ३६ बर्षिय प्रकाश कुँवर र ३४ बर्षिय दिपक परियारको ज्यान गएको थियो । बडिगाड–१० का युवाले कुटपिट गरेपछि भीरबाट खसालेर हत्या गरेका थिए । पक्राउ परेका दुबै जनालाई लगत कट्टाको लागि जिल्ला अदालतमा पठाईएको सुचना अधिकारी केसीले जानकारी दिए ।
