बागलुङ, २७ असोज– बरिष्ठ सइ उज्वल पौडेल हत्यामा संलग्न भएको आरोपमा प्रहरीले थप एक जनालाई पक्राउ गरेको छ । बडिगाड गाउँपालिका–६ स्थित प्रहरी चौकी इन्चार्ज पौडेलको गत साउन ४ गते हत्या भएको थियो ।
हत्या आरोपमा आसा खाजा घरका संचालक आशा कुँवर र उनका छोरा बिनोद पक्राउ परेको तीन महिनापछि स्थानीय बिशाल सुनार पनि पक्राउ परेका हुन् । पक्राउ परेका सुनार १९ बर्षका छन् । ‘अनुसन्धानको क्रममा सुनार पनि संलग्न भएको खुल्यो’ प्रहरी नायव उपरिक्षक मदन केसीले भने, ‘म्याद थप गरेर उनको अनुसन्धान भैरहेको छ ।’ डिउटीबाट फर्केर खाजा खान गएका बरिष्ठ सई पौडेलको उक्त दिन राती १० बजे हत्या भएको थियो ।
होटल संचालक आसा कुँवरसँग भनाभन भएपछि कुँवर र उनकै छोरा बिनोदले टाउकोमा मुक्का हानेर बेहोस बनाएपछि पर्दाले घाँटीमा थिचेर हत्या गरेको प्रहरी रिर्पोट थियो । अनुसन्धानको क्रममा प्रहरीले बिहिबार सुनारलाई पक्राउ गरेको हो । पक्राउ परेका सुनारलाई जिल्ला अदालतले अनुसन्धानका लागि ५ दिन म्याद थप गरि थुनामा राख्ने आदेश दिएको छ ।
