बागलुङ, १ कात्तिक– जिल्लाको नारायणस्थानबासीले स्वास्थ्यचौकीबाट प्रवाह हुने स्वास्थ्य सेवालाई जनमुखी बनाउनुपर्नेमा जोड दिएका छन् । स्वास्थ्य सेवा जनमुखी नहँुदा आम नागरिकले स–सानो रोगका लागि पनि बिभिन्न समस्या भोग्नुपर्ने भएकाले स्वास्थ्य सेवालाई छिटोछरितो र सेवाग्राहीमैत्री बनाउनुपर्नेमा उनीहरुले जोड दिएका हुन् ।
बागलुङ नगरपालिका–१४ नारायणस्थानस्थित स्वास्थ्यचौकी संचालन तथा व्यवस्थापन समितिले आयोजना गरेको सार्वजनिक सुनुवाइ कार्यक्रममा स्थानीयबासीले स्वास्थ्य सेवालाई जनमुखी बनाउन सकेमा मात्र नागरिकको जीवन सहज हुने बताएका थिए ।
स्वास्थ्यचौकीबाट प्रवाह हुने स्वास्थ्य सेवालाई थप जनमुखी र व्यवस्थित बनाउने अभिप्रायले आयोजना गरिएको कार्यक्रममा स्थानीयले स्वास्थ्यचौकीबाट प्रवाह भैरहेका सेवासुविधा, कर्मचारीले गर्ने व्यवहार, औषधी बितरण प्रक्रिया, बिमा प्रक्रिया लगाएतका बिषयमा जिज्ञासा राखेका थिए ।
सहभागीबाट उठेको जिज्ञासामा बागलुङ नगरपालिकाका स्वास्थ्य शाखा प्रमुख रामप्रसाद खनाल, वडा अध्यक्ष चक्रबहादुर खत्री, नगरपालिकाका सिनियर अहेव अधिकृत बिष्णुप्रसाद शर्मा र स्वास्थ्यचौकी इन्चार्ज ऋषीराम शर्माले जवाफ दिएका थिए ।
कार्यक्रम नारायणस्थान स्वास्थ्यचौकी संचालन तथा व्यवस्थापन समितिका अध्यक्ष एवम् वडा अध्यक्ष चक्रबहादुर खत्रीको अध्यक्षता, स्वास्थ्यचौकी इन्चार्ज ऋषीराम शर्माको स्वागत र धौलागिरि एफएमका सम्पादक ताराप्रसाद शर्माको संचालनमा सम्पन्न भएको थियो ।
