पोखरा, १८ फागुन – गण्डकी प्रदेशका पर्यटन, उद्योग, वाणिज्य तथा आपूर्तिमन्त्री मणिभद्र शर्मा कँडेलले कोरोना प्रभावित पर्यटनको पुनरुत्थान सरकारको प्राथमिकतामा रहेको बताएका छन् ।
उनले कोरोना प्रभावित व्यवसायलाई राहत उपलब्ध गराउने उद्देश्यका साथ व्यवसाय जीवन रक्षा कोष, कर्मचारी पर्यटन विदा, पर्यटन मजदुर लक्षित राहत कार्यक्रम अगाडि सारिएको बताए । मन्त्री कँडेल पर्यटन व्यवसायी महिला संघ (टेवान)को चौथो वार्षिक साधारणसभामा बोल्दै थिए ।
कार्यक्रममा बोल्दै टेवानका अध्यक्ष रेनु थापाले दीगो पर्यटनका लागि समान सहभागिता भन्ने नाराका साथ अघि बढेको संस्थाले सदस्यको क्षमता एवम् सीप अभिवृद्धिका लागि विभिन्न कार्यक्रम ल्याएको जानकारी दिइन् । उनले महिला सशक्तिकरण र उद्यमीलता संस्थाको लक्ष्य भएको बताइन् ।
पोखरा पर्यटन परिषद्का अध्यक्ष गोपिबहादुर भट्टराईले आर्थिक व्यवस्थापन नहुँदासम्म व्यवसाय राम्रो हुन नसक्ने बताउँदै कोरोना प्रभावित व्यवसायीलाई सरकारको साथ र सहयोग आवश्यक हुने दोहो¥याए ।
पोखरा पर्यटन परिषद्का पूर्व अध्यक्ष एवम् नेपाल पर्यटन बोर्डका पूर्व सदस्य टीकाराम सापकोटाले कोरोना प्रभावित व्यवसायीका लागि तीनवटै सरकारले अघि सारेका राहत प्याकेज लक्षित वर्गसम्म पुग्नुपर्नेमा जोड दिए ।
