बागलुङ, १८ फागुन – जैमिनी नगरपालिकाको प्रशासनिक भवन निर्माण सुरु भएको छ । नगरप्रमुख इन्द्रराज पौडेलले प्रशासनिक भवनको एक समारोहबीच शिलान्याश गरे ।
आफ्नो कार्यकाल सकिनै लाग्दा भवनको शिलान्यास गरेका नगरप्रमुख पौडेलले भवनको पूर्णता अबका जनप्रतिनिधिले दिने आशा व्यक्त गरे ।
करिब ३ बर्षमा निर्माण सक्नेगरी जिम्मा पाएको निर्माण कम्पनीले ४ तलाको ४२ कोठे भवन निर्माण गर्नेछ ।
शिलान्यास कार्यक्रममा नगरप्रमुख पौडेल, उपप्रमुख लिला राना, प्रमुख प्रशासकीय अधिकृत ज्ञानराज कोइराला, नगरपालिकाका कर्मचारीसहित वडाध्यक्ष उपस्थिति थिए । प्रशासनिक भवन निर्माण भएपछि नगरको कार्यसम्पादनमा सहज हुने पौठेलले बताए ।
रविना प्राकृतिक जुगल जेभीले ८ करोड १७ लाख ६५ हजार ८२ रुपैयाँमा भवन निर्माणको काम थालेको हो ।
२०८१ साल असार मसान्तसम्म भवन निर्माण सक्ने गर्नेगरी माघ २१ गते ठेक्का सम्झौता गरिएको जैमिनी नगरपालिकाका इन्जिनियर विवेक सापकोटाले वताए ।
जैमिनी नगरपालिकाले कुश्मिसेरा बजारको ठेउलेखोला र टिमुर खोलाको दोभानमा आफ्नै प्रशासनिक भवन बनाउन लागेको हो ।
