तनहुँ, ८ चैत – नाबालिगलाई जबर्जस्ती करणी गरेको अभियोगमा जिल्ला प्रहरी कार्यालय तनहुँको हिरासतमा रहेका अभिनेता पल शाह (पुर्णविक्रम शाह) विरुद्ध परेको उजुरीको अनुसन्धान सकिएको छ । प्रहरीले अभिनेता शाहमाथि परेको मुद्दाको अनुसन्धान प्रक्रिया पूरा गरी सोमवार मिसिल सरकारी वकिलको कार्यालयमा बुझाएको हो ।
तनहुँ प्रहरीले जिल्ला अदालतबाट शाहविरुद्ध तेश्रो पटक गत चैत ४ गते पाँच दिनको म्याद थप गरी अनुसन्धान पूरा गरेको छ । यसअघि प्रहरीले अदालतबाट फागुन १५ गते सात दिन र २२ गते १२ दिनको म्याद थप गरी हिरासतमा राखेर आवश्यक अनुसन्धान गरेको थियो ।
प्रहरीले सबै अनुसन्धान सकेर मिसिल सरकारी वकिलको कार्यालयमा सोमबार पठाएको हो । सरकारी वकिलको कार्यालयले एक/दुई दिनभित्रै अभियोगपत्र तयार गरेर जिल्ला अदालतमा मुद्दा दर्ता गर्ने तयारी गरेको बताइएको छ ।
यस्तै, अभियुक्त शाहविरुद्ध गत बिहीबार जिल्ला अदालत नवलपरासीमा मुद्दा दर्ता भइसकेको छ । शाहविरुद्ध नवलपरासीमा मुलुकी अपराध संहिता २०७४ को दफा २१९ को १ र २ अनुसारको कसुर गरेको दाबी गर्दै मुद्दा दायर भएको थियो । कानुनको उक्त दफामा महिलाको मन्जुरी नलिई करणी गरेमा बलात्कार हुने र १८ वर्षभन्दा कम उमेरकी महिलासँग मञ्जुरीमै करणी गरे पनि बलात्कार हुने उल्लेख छ ।
जिल्ला प्रहरी कार्यालय तनहुँमा १७ वर्षीया नाबालिगका बुबाले म्युजिक भिडियो छायांकनका क्रममा अभिनेता शाहले बारम्बार जबर्जस्ती करणी र यौन दुव्र्यवहार गरेको आरोप लगाउँदै गत फागुन ११ गते जाहेरी दर्ता गराएका थिए । जाहेरीमा शाहले म्युजिक भिडियो सुटिङका क्रममा ती नाबालिकामाथि पटकपटक करणीको प्रयास गरेको र अन्त्यमा विवाहको प्रलोभन देखाई तनहुँमा करणी गरेको उल्लेख गरिएको छ । करिब ३ महिना अगाडिदेखि एकोहोरो जस्तो बस्ने गर्दै आइरहेकीले ‘छोरीलाई के भएछ ?’ भनी परिवारले कर गर्दा करणीको कुरा खुलाएको जाहेरीमा उल्लेख छ ।
तनहुँमा जाहेरी दर्ता भएको ५ दिनमा शाह प्रहरीको सम्पर्कमा पुगेका थिए । त्यसपछि नाबालिकाले गत फागुन १५ गते शाहविरुद्ध जिल्ला प्रहरी कार्यालय नवलपरासी पूर्वमा पनि जाहेरी दिएकी थिइन् । तनहुँ प्रहरी हिरासतमा रहेका शाहलाई गत फागुन २४ गते गैंडाकोट लागि सरकारी वकिलले वयान लिएका थिए । सोही वयानको आधारमा गत बिहीबार नवलपरासी अदालतमा मुद्दा दर्ता गरिएको हो ।
मुलुकी अपराध संहिता २०७४ को दफा १९ को ३ (ग) बमोजिम १४ देखि १६ वर्षसम्मका नाबालिकालाई करणी गरेको अवस्थामा १२ देखि १४ वर्षसम्मको कैद सजाय हुन्छ ।
