बेनी, २२ मंसिर – म्याग्दीको मंगला गाउँपालिका-१ कुहुँ पूर्णगाउँकी बाल अभियन्ता प्रेन्सा रेग्मीलाई ‘ग्लोबल चाइल्ड प्रोडिजी अवार्ड्स २०२२’ का लागि विश्वबाट सय बाल प्रोडिजीमा छनोट भएकी छन् ।
विश्वभरका ६८ भन्दा बढी देशहरूका बालबालिकाको सहभागिता रहेको प्रतियोगितामा प्रतिभावान एवं बाल सामाजिक अभियन्ता रेग्मी छनोट भएकी हुन् ।
सामाजिक कार्यमा सक्रिय रहेकी रेग्मीलाई संस्थाका अध्यक्ष तथा कार्यकारी प्रमुख प्रशान्त पाण्डेले अवार्डमा छनोट भएको पत्र पठाउँदै बधाइ दिएका छन् । पोखरामा बसेर अध्ययनरत प्रेन्सा सानै उमेरबाट सामाजिक कार्यमा सक्रिय छिन् ।
उनले अहिलेसम्म थुप्रै सामाजिक अभियान चलाइसकेकी छन् । कोरोना महामारीमा मास्क अभियान, फुड बैंक, बुक बैंक, सरसफाई अभियान, १६ वर्ष मुनिका बालबालिकालाई मद्यपान, धुम्रपान सेवन नगर्न र बिक्रीवितरण नगर्ने अभियान लगायत अभियानबाट चर्चामा आएकी हुन् ।
उनले पछिल्लो समय दिएका अन्तर्वार्ताको समेत निकै चर्चा हुने गरेको छ । बालिकामाथि हुने हिंसा, बलात्कारका घटना न्यूनीकरण गर्न कडा कानुन बनाउनुपर्ने लगायतका माग राखेर उनले विभिन्न निकायमा समेत ज्ञापनपत्र समेत बुझाएकी थिइन् ।
