म्याग्दी, २२ बैशाख– भौगोलिक रुपमा विकट र दुर्गम क्षेत्रमा अवस्थित म्याग्दीको धवलागिरि गाउँपालिका वडा नम्बर १ गुर्जाको स्वास्थ्य चौकीलाई चौध लाखभन्दा बढी मूल्य बराबरको औषधि र उपकरण प्राप्त भएको छ ।
दक्षिण कोरियाको द नानुम पल्स र मुगुङ्वा वेलफेयर वल्र्डले गुर्जा स्वास्थ्य चौकीलाई चौध लाख ८४ हजार ४ सय मूल्य बराबरको औषधि र उपकरण सहयोग गरेका हुन् । एक थान अक्सिजन कन्सनट्रेटर, इएनटी मेडिसिन, फोरकेप सेट र औषधि स्वास्थ्य चौकीलाई उपलब्ध गराइएको हो ।
संस्थाका प्रतिनिधि लिमजङ हि र छोमजङ हिले वडाध्यक्ष झकबहादुर छन्त्याललाई सामग्री र औषधि हस्तान्तरण गरेका थिए । यसैगरी संस्थाले वडा कार्यालयसँग समन्वय गरेर आयोजना गरेको निशुल्क स्वास्थ्य शिविरबाट २ सय जना लाभान्वित भएका छन् ।
चिकित्सक लोकेन्द्र छन्त्याल, स्वास्थ्यचौकीका सागर रोका, सुस्मिता छन्त्याल, रिमा शर्मालगायत स्वास्थ्यकर्मी र कर्मचारीले सेवा दिएका थिए । शिविरमा स्वास्थ्य परीक्षण, परामर्श र निशुल्क औषधि वितरण गरिएको थियो ।
