बागलुङ, २२ बैशाख– नेकपा एमाले काठेखोला गाउँपालिकाले सञ्चालन गरेको चुनावी सभा तथा घरदैलो कार्यक्रम बुधबार वडा नं. ४ तंग्रामका विभिन्न स्थानमा सम्पन्न भएका छन् ।
चुनावी सभामा बोल्दै एमाले गण्डकी प्रदेश कमिटि सदस्य रामबहादुर जिसीले पाँचतिर फर्किएका राजनीतिक दलहरुले सत्ता स्वार्थका कारण गरेको गठबन्धन स्थानीय तहको निर्वाचन सकिदा नसकिदै भत्कने बताएका छन् ।
सत्ता स्वार्थका लागि गरिएको गठबन्धनले चुनाव नजिते उनीहरुका बीच मारामार हुने र चुनाव जिती हाले पनि पहिलो बैठकबाटै झगडा शुरु हुने भएकाले जनताले विचार गरेर मतदान गर्नुपर्ने उनको भनाई थियो ।
कार्यक्रममा नेकपा एमालेका प्रदेश कमिटि सदस्य हरि बहादुर कुँवर र जिल्ला सचिवालय सदस्य तथा काठेखोला गाउँपालिकाका अध्यक्ष अमर बहादुर थापाले काठेखोलाको विकास र समृद्धिका लागि एमाले नेतृत्वलाई विजयी गराउन आव्हान गरेका थिए ।
एमालेका तर्फबाट काठेखोलामा अध्यक्षका उमेदवार डिल बहादुर कार्कीले एमालेले अघिल्लो निर्वाचनमा तंग्राममा जनजाती संग्राहलय निर्माण गर्ने प्रतिवद्धता गरेअनुरुप संग्राहलय निर्माण कार्य शुरु भएको र आगामी कार्यकालमा त्यसलाई पूर्णता दिइने बताए ।
चुनावी सभाभन्दा पहिला काठेखोला गाउँपालिकामा एमालेका उमेदवारहरु र नेता कार्यकर्ताहरुको टोलीले तंग्रामका फापरखेत, पेरिवाङ चिल्लेडाडा, रानीकराङ, ठुलोगाउँ लगायतका स्थानमा घरदैलो टोल भेला सम्पन्न गरेको थियो ।
