बागलुङ, १९ भदौ– नेकपा एमालेले प्रतिनिधि सभा निर्वाचनका लागि बागलुङ क्षेत्र नं. १ बाट ६ जनालाई संभावित उमेदवारको रुपमा सिफारिस गरेको छ ।
पार्टीले माथिल्लो तहमा सिफारिस गरेपछि उनीहरु मध्येबाट संसद पदका लागि टिकट ल्याउने प्रावधान छ । आइतबारको बैठकले मनकुमारी केसी, इन्द्रलाल सापकोटा, सूर्य पाठक, सावित्री राना, संजाल शर्मा र राम शर्मालाई छनौट गरेको हो । केसी र पाठक बहालवाला सांसद हुन् भने केसी समानुपातिक र पाठक प्रत्यक्ष निर्वाचित सांसद थिए । गत निर्वाचनमा समानुपातिक सांसद बनेकाहरु यो पटक समानुपातिकमा बस्न नपाउने प्रावधानपछि केसीले प्रत्यक्षमा नाम राखेकी हुन् ।
राना पनि गण्डकी प्रदेशसभा सदस्य हुन् । उनी समेत समानुपातिक सांसद भएकोले यो पटक दोहोरिन नपाउने सूचिमा छिन् । सापकोटा पार्टी केन्द्रिय सदस्य तथा प्रदेश सभाका सदस्य हुन् । उनी अघिल्लो पटक प्रत्यक्ष निर्वाचित थिए । एमालेले यस अघि प्रदेश सभाका लागि भने उमेदवार सिफारिस गरिसकेको छ ।
