फाइल तस्बिर
बागलुङ, २६ मंसिर– जैमिनी नगरपालिकाको केन्द्र कुश्मीसेरा बजारलाई कालीगण्डकी करिडोरसँग जोड्ने पहुँचमार्ग कालोपत्रे गर्ने कार्य पुनः अघि बढाइएको छ । यसअघि उक्त सडक कालोपत्रे गर्ने काम संघीय सरकार, प्रदेश सरकार र स्थानीय सरकारको साझेदारीमा थालिए पनि बीचमै रोकिएको थियो ।
जैमिनी नगर कार्यपालिकाको बैठकले कुश्मीसेरादेखि जैमिनीधाम सडक कालोपत्रेका लागि २ करोड विनियोजन गरेको उपप्रमुख हरिहर शर्माले जानकारी दिए । कुश्मीसेरादेखि जैमिनीधामसम्मको तीन किलोमिटर सडकमध्ये दुई किलोमिटर सडक कालोपत्रेका लागि रकम विनियोजन गरिएको हो । तीन वर्षसम्म समपूरक कोषबाट काम गर्दासमेत सडक अधुरै रहेपछि नगरपालिकाले आन्तरिक स्रोतबाट थप सडक कालोपत्रे गर्न लागेको हो ।
सडकको स्तरोन्नति र एक किलोमिटर सडक कालोपत्रेका लागि यसअघि ८ करोडको लागत अनुमान गरिएको थियो । पहिला दुई वर्षमा १ करोडभन्दा कम बजेट खर्च भएको उक्त सडकमा पछिल्लो वर्ष २ करोड ७० लाख खर्च भएको थियो । कोरोना, बाढीपहिरोलगायत समस्याका कारण समपूरक कोषमार्फत विनियोजन भएको बजेट खर्च नहुँदा सडक कालोपत्रेको काम बीचमै रोकिएको थियो । संघीय सरकारले एउटै योजनामा तीन वर्षभन्दा धेरै साझेदारी नगर्ने भएकाले समपूरक कोषको साझेदारी सकिएपछि नगरपालिकाले बजेट विनियोजन गरेको शर्माले बताए ।
‘करिडोर कालोपत्रे हुने चरणमा छ, करिडोरसँग जोडिने यो सडक हामीले तत्काल कालोपत्रे गर्दा जैमिनीको लाइफलाइन बन्छ’, शर्माले भने, ‘हामीले संघ र प्रदेशसँग बजेट माग गरेका छौँ, अब पुरानो होइन् नयाँ डिपिआर गरेर बाँकी खण्डको काम कालोपत्रे गर्छौं ।’ सात मिटर चौडाइ सडक, नाली र दुई किलोमिटर लम्बाइ रहेको सडक कालोपत्रेका लागि ५ करोड लागत अनुमान भएपनि अपुग हुने रकम प्रदेश र संघीय सरकारसँग माग गरिने उपप्रमुख शर्माले बताए ।
यो सडक कालोपत्रे हुँदा राष्ट्रिय गौरवको आयोजना कालीगण्डकी करिडोरसँग पाँचदेखि सात मिनेटको दुरीमा पालिकामा मुकाम जोडिनेछ । जैमिनीका सबै आर्थिक क्रियाकलाप सञ्चालन र पर्यटन प्रवद्र्धनमा सहयोग गर्ने शर्माको भनाई छ ।
