म्याग्दी, २७ मंसिर– जिल्लाको मालिका गाउँपालिका वडा नं. ६ रातोढुंगामा निर्माणाधीन सबस्टेशन अझै बन्न सकेको छैन । चार वर्षअघि नै सम्पन्न हुनुपर्ने ३३÷११ केभी क्षमताको सबस्टेशन अझै पूरा नभएको हो ।
सबस्टेशन निर्माणमा भएको ढिलाइले जिल्लाको पश्चिमी क्षेत्रमा पर्ने मंगला, मालिका र धवलागिरि गाउँपालिकामा केन्द्रीय प्रशारण लाइन विस्तार तथा विद्युत् आपूर्ति प्रभावित भएको मालिका गाउँपालिका दुखुका ओमकार रोकाले बताए ।
पचासी प्रतिशत भौतिक प्रगति भएको आयोजना मिलनचोकदेखि रातोढुंगा जोड्ने प्रशारण लाइनको खम्बा गाड्न र तार तान्ने क्रममा विवाद भएपछि रोकिएको आयोजना प्रमुख बोधराज ढकालले जानकारी दिए ।
‘६ सयमध्ये तीन ठाउँमा बाँकी खम्बा गाड्न र तार तान्न नपाउँदा आयोजनाले पूर्णता पाउन सकेको छैन्’ ढकालले भने । जग्गाका धनी र वन समूहको अवरोधले पर्वतको जलजला गाउँपालिका वडा नं. ४ मोहनचोकदेखि रातोढुंगा जोड्ने २२ किलोमिटर दूरीको प्रशारण लाइन निर्माण रोकिएको ढकालले बताए ।
नेपाल विद्युत् प्राधिकरणमार्फत ए टु जेड इञ्जिनीयरिङले ८ करोडमा सन् २०१६ मा ठेक्का लिएको सबस्टेशन प्रशारण लाइन २०१८ को डिसेम्बरमा सक्ने लक्ष्य थियो । सुरुआती चरणमा जग्गा अधिग्रहणमा भएको ढिलाइले प्रभावित बनेको थियो ।
सबस्टेशन बनाउन सात रोपनी जग्गा अधिग्रहण भएको थियो । सबस्टेशन वरपरका जग्गाधनीले बाटो बनाउन, घेराबार पर्खाल लगाउन र प्रशारण लाइनको तार तान्न अवरोध गरेको ठेकेदारले बताएका छन् । म्याग्दी प्रदेशसभा (२) बाट निर्वाचित रेशमबहादुर जुग्जालीले निर्माण व्यवसायी र आयोजनाका अधिकारीलाई सम्पर्क गरी सवस्टेशन निर्माणलाई पूर्णता दिन पहल थालिएको बताए ।
सबस्टेशन र प्रशारण लाइन निर्माण भएपछि पश्चिमी क्षेत्रको धौलागिरि, मालिका र मंगलामा केन्द्रिय प्रशारण लाइनको विद्युत् सेवा विस्तारमा सहज हुने नेपाल विद्युत् प्राधिकरणको म्याग्दी वितरण केन्द्रका प्रमुख प्रशान्तकुमार झाले बताए ।
