निसीखोलामा २३ हजार नागरिकको स्वास्थ्य बीमा गरिँदै

बागलुङ, १२ पुस– जिल्लाको निसीखोला गाउँपालिकाले २३ हजारभन्दा बढी नागरिकको निशुल्क स्वास्थ्य बिमा गर्ने भएको छ । स्थानीय तहको निर्वाचनमा गरिएको प्रतिवद्वता अनुसार नागरिकको निशुल्क स्वास्थ्य बीमा गर्न लागिएको हो ।
गाउँपालिकाका अध्यक्ष सूर्यबहादुर घर्ती मगरले पालिकाभर रहेका २३ हजार तीन सय बढी नागरिकलाई स्वास्थ्य सेवाको सहज पहुँचमा ल्याउन निःशुल्क स्वास्थ्य बीमा गर्न थालिएको बताए । ‘अब कसैले पनि आर्थिक अभावमा उपचार नपाई अकालमा ज्यान गुमाउनुपर्ने छैन’ घर्तिले भने ।
नेपाल सरकारले लिएको स्वास्थ्य बीमा अभियानमा हातेमालो गर्दै दूरदराजमा रहेका नागरिकलाई अभियानमा सहभागी गराउने गाउँपालिकाको योजना छ । पौष महिना भित्र सबै नागरिकको निशुल्क स्वास्थ्य बिमा गरिसक्ने गरी अभियान चलाईएको उपाध्यक्ष प्रेमबहादुर घर्तिले जानकारी दिए ।
निशुल्क स्वास्थ्य बीमाका लागि गाउँपालिकाले यसवर्ष २ करोड बजेट विनियोजन गरेको छ । स्वास्थ्य बिमा अभियानबाट कोही पनि नागरिक नछुटुन भन्दै पालिकाले सबै वडामा स्वास्थ्यकर्मी तथा कर्मचारीसमेत खटाएको छ ।