पर्वत, १४ पुस– जिल्लामा निर्माण भएको मध्यमोदी जलविद्युत् आयोजनाको परीक्षण सफल भएको छ । मिडिल मोदी हाइड्रोपावर लिमिटेडले निर्माण गरेको १८ मेगावाट क्षमताको मध्यमोदी जलविद्युत् आयोजनाले आठ वर्षपछि परीक्षण उत्पादन गरेको थियो ।
परीक्षण उत्पादन सफल भएपछि यसै सातादेखि व्यावसायिक उत्पादनको तयारी छ । परीक्षण उत्पादन सफल भएपछि केही दिनभित्रै व्यावसायिक उत्पादन सुरु गरिने आयोजना प्रमुख प्रविन देसारले जानकारी दिए । विद्युत आयोजना लक्ष्यभन्दा झण्डै पाँच वर्ष ढिला निर्माण सम्पन्न भएको हो ।
कास्कीको अन्नपूर्ण गाउँपालिका वीरेठाँटी र मोदी गाउँपालिका भूकको भुरुङडाँडामा बाँध निर्माण गरेर ल्याइएको मोदीखोलाको पानी पर्वतको मोदी गाउँपालिका समादीमा खसालिएको छ । आयोजनाका लागि २ हजार ८ सय ४० मिटर लम्बाइको ‘टनेल’बाट ल्याइएको पानी ७७ मिटर टेलरेसबाट मोदीखोलामा खसालिएको छ ।
सम्झौतानुसार प्राधिकरणले आयोजना निर्माण सम्पन्न हुनुअघि नै विद्युत् गृहबाट देउपुरसम्म चार किलोमिटर लामो प्रसारण लाइन बनाएको छ । विद्युत् प्राधिकरण पर्वत वितरण केन्द्रका प्रमुख शिवनारायण गोशलीका अनुसार परीक्षणको काम सकिएपछि १५ दिनलाई ‘ट्रायल फेज’का रूपमा राखिएको थियो ।
आयोजनाबाट उत्पादन हुने विद्युत्लाई मोदी गाउँपालिकाकै पातिचौरमा रहेको कोरुङ्गा सबस्टेशनमा लगेर १ सय ३२ केभी लाइनमा जोडेर राष्ट्रिय प्रसारण लाइनमा पठाइने छ । पातीचौर सबस्टेशनबाट कास्कीको पोखरामा रहेको लेखनाथमा पुग्ने र अर्को जडान कास्कीकै माछापुच्छे« गाउँपालिकाको लाहाचोक पुग्नेछ ।
आयोजनाको लागतसहित उत्पादन क्षमता १८ मेगावाट पुगेको छ । सुरुमा २ अर्ब ८० करोड लागत लाग्ने अनुमान गरिएपनि निर्माणमा भएको ढिलाइ, महँगी, र आन्दोलन लगायतका समस्याले आयोजनाको लगानी सोचेको भन्दा दोब्बर अर्थात् ४ अर्ब ९२ करोड रुपैयाँ पुगेको छ ।
