काठमाडौं, २४ माघ– कोरोनाको नयाँ भेरियन्ट (ओमिक्रोन) नियन्त्रणमा समेत काम गर्ने भनिएको फाइजरको नयाँ खोप बाइभलेन्ट खोप फागुनको पहिलो साता नेपाल आउने भएको छ ।
कोभ्याक्सको काम गरिरहेको गाभीमार्फत १५ लाख डोज फाइजरको नयाँ खोप ल्याउन लागिएको स्वास्थ्य सेवा विभागको आपूर्ति व्यवस्थापन शाखा प्रमुख सुरेन्द्र चौरसियाले जानकारी दिए ।
चौरसियाका अनुसार फागुन १ गतेदेखि ४ गतेसम्म खोप आउने कार्यतालिका रहेको छ । ‘अहिले हामीले १५ लाख मागेका हौं । यसको खपतको आधारमा पछि आवश्यकता हेरेर थप १५ लाख ल्याउने योजना छ’, चौरासियाले भने ।
छिमेकी देश चीनमा ओमिक्रोनको उपप्रजाति बी.एफ–७ फैलिरहेकाले सरकारले बुस्टर खोप लगाउन छुटेका सबैलाई खोप लगाउन आग्रह गर्दै आएको छ । विज्ञका अनुसार, ओमिक्रोनका सबभेरिन्यटको संक्रमणलाई रोक्न बाइभलेन्ट खोप बढी प्रभावकारी छ ।
