काठमाडौं, २९ माघ– चितवन क्षेत्र नं. २ मा आगामी वैशाख १० मा उपनिर्वाचन गरिने भएको छ । निर्वाचन आयोगको आइतबार बसेको बैठकले वैशाख १० गते आइतबार गर्नेगरी उपनिर्वाचनको मिति घोषणा गरेको हो ।
यसअघि निर्वाचित भएका रवि लामिछाने नागरिकता विवादमा दोषी ठहर भएसँगै यस क्षेत्रमा सांसद पद रिक्त भएको थियो । राष्ट्रिय स्वतन्त्र पार्टीले यस क्षेत्रमा उपनिर्वाचनको मिति चाँडो तोक्न दबाब दिँदै आएको छ ।
मंसिरमा भएको निर्वाचनमा लामिछानेले निकटतम प्रतिद्वन्द्वी नेपाली कांग्रेसका उम्मेदवार उमेश श्रेष्ठलाई ३४ हजार १ सय ६२ मतान्तरले पराजित गरेका थिए । लामिछानेले ४९ हजार २ सय ६१ मत ल्याउँदा श्रेष्ठले १५ हजार ९९ मत ल्याएका थिए । एमालेका कृष्णभक्त श्रेष्ठ १४ हजार ६ सय ४९ मत मात्रै ल्याएका थिए ।
