पर्वत, ३ फागुन– जिल्लाको फलेवास नगरपालिका–४ मुडिकुवाले स्वास्थ्यकर्मीलाई ज्येष्ठ नागरिकको दैलोमा पठाएर स्वास्थ्य जाँच गर्ने र आवश्यक परामर्श दिन थालेको छ ।
६५ वर्ष उमेर पूरा गरेका वडाका ज्येष्ठ नागरिकको स्वास्थ्य परीक्षणको काम भइरहेको वडाध्यक्ष तथा फलेवास नगरपालिकाका प्रवक्ता अच्युत तिवारीले बताए । ‘घरदैलो स्वास्थ्य जाँच तथा सुगर परीक्षणको काम स्वास्थ्यकर्मीबाट भइरहेको छ’ तिवारीले भने, ‘घरदैलो स्वास्थ्य परीक्षण कार्यक्रमले हिँड्न नसक्ने ज्येष्ठ नागरिकलाई सहज भएको छ ।’
मुडिकुवा स्वास्थ्य चौकीमा कार्यरत भई ज्येष्ठ नागरिकको स्वास्थ्य परीक्षणका लागि हरेक टोलमा पुगेको मुडिकुवा स्वास्थ्य चौकीकी अनमी संगीता लामिछानेले बताइन् । गत माघ २३ गतेबाट घरदैलो स्वास्थ्य परिक्षण कार्यक्रम शुरु भएको हो । ‘स्वास्थ्य चौकीमा कार्यरत पाँच स्वास्थ्यकर्मीले तालिका बनाएर काम गरेका छौ’ लामिछानेले भनिन् ।
स्वास्थ्यकर्मीले ज्येष्ठ नागरिकको स्वास्थ्य जाँचसंगै उनीहरूले सेवन गरेको औषधिको प्रभाव, खाने तरिकाबारे जानकारी लिने, स्वास्थ्य जाँच गर्दा देखिएको अवस्थाबारे जानकारी गराएर थप उपचारको लागि परामर्श दिने काम गर्दै आएका छन् ।
वडाको स्वास्थ्य संस्थामा कर्मचारी अभाव हुँदा तीव्र गतिमा सेवा दिन नसकिएको वडा अध्यक्ष तिवारीको भनाई छ । घरदैलो स्वास्थ्य परिक्षण अभियानबाट हालसम्म दुई सयभन्दा बढी ज्येष्ठ नागरिकको स्वास्थ्य जाँच गरिएको तिवारीले जानकारी दिए ।
