बागलुङ, १० फागुन– जिल्लाको निसीखोला गाउँपालिकाले स्वास्थ्य बिमा बापतको रकम समयमै भुक्तानी नगर्दा सर्वसाधारण स्वास्थ्य बिमा सुविधाबाट बञ्चित भएका छन् ।
सबै नागरिकलाई स्वास्थ्य बिमामा सहभागि गराउन गाउँपालिकाले बिमा बापतको रकम समयमै भुक्तानी नदिँदा बिमा कार्यान्वयनमा नआएको हो । स्वास्थ्य बिमाका लागि फाराम भरेर बसेका निसीखोलाबासी बिमा सुविधा उपभोगबाट बञ्चित बनेका हुन् ।
गाउँपालिकाले पहिलो चरणको ६४ लाख रुपैयाँ बीमा रकम भुक्तानी गर्न नसक्दा स्वास्थ्य बीमाको काम अघि बढ्न सकेको छैन । गत असारमा सम्पन्न दशौं गाउँसभाले पालिकाका सबै नागरिकको निःशुल्क स्वास्थ्य बीमा गर्ने घोषणा गरेको थियो ।
५ हजार ४ सय घरधुरीका लागि निःशुल्क बिमा गर्न गाउँसभाले राजश्व बाडफाँडबाट २ करोड रुपैयाँ बजेट विनियोजन गरेको थियोे । पालिकाले पहिलो चरणमा ९ हजार १ सय ८५ जनाको विवरण संकलन गरेपनि बीमाको रकम भुक्तानी नहुँदा कार्यान्वयनमा ढिलाई भएको गाउँपालिकाका सूचना अधिकारी पुरुषोत्तम गौतमले बताए ।
संघ, प्रदेश र पालिकाको श्रोतको राजश्व बाँडफाँडबाट बीमा गर्ने निर्णय गाउँसभाले पारित गरेको थियो । भुक्तानी भएको ३ महिनामा स्वास्थ्य बीमाको सेवा लिन पाउने प्रावधान छ । प्रदेश र संघबाट बजेट प्राप्त नहुँदा कार्यान्वयनमा समस्या भएको गौतमको भनाई छ ।
गाउँपालिकाका निमित्त प्रमुख प्रशासकीय अधिकृत दिलिप कुमार चन्दले पहिलो चरणमा परिवारको विवरण आएपनि विशेष विवरण नआएको प्रतिक्रिया दिए । ‘प्रदेश र संघीय सरकारबाट थोरै बजेट आयो, एक सातामा बजेट हेरेर भुक्तानी गछौं’ चन्दले भने ।
