म्याग्दी, १३ फागुन– जिल्लाको धौलागिरि गाउँपालिका लमसुङको मरेनीमा २० वर्षदेखि बाँझो रहेको जग्गामा स्थानीयले सामूहिक आलुखेती सुरु गरेका छन् । लगनशील बहुउद्देश्यीय कृषक समूहले मरेनीमा ४४ रोपनी जग्गामा झाडी फँडानी गरेर आलुखेती विस्तार गरेका हुन् ।
समूहमा आबद्ध १८ जनाले व्यावसायिक रुपमा सामूहिक आलु खेती गरेको अध्यक्ष गौसरा विकले बताइन । यो वर्ष एक सय रोपनी जग्गामा आलु लगाउने तयारी गरेको समूहले मरेनीसँगै पैरेनी र लमसुङमा समेत आलुखेती विस्तार गर्ने योजना बनाएको छ ।
मरेनीमा जग्गा भाडामा लिएर २० मुरी आलुको बीउ रोपिएको छ । गाउँपालिकाको आलु पकेट कार्यक्रममार्फत सामूहिक रुपमा आलु खेती सुरु गरेका कृषक समूहले मरेनीमा मात्रै ४४ रोपनी जग्गामा स्थानीय जातका आलु लगाएको गाउँपालिकाका कृषि शाखाका प्राविधिक सहायक अमृत थापाले जानकारी दिए ।
‘बाँझो जग्गामा आलु खेती गरिएपछि वर्षांैदेखि बाँझो रहेको जग्गाको स्वरुप नै फेरिएको छ, यसलाई आगामी वर्षमा निरन्तरता दिन स्थानीय कृषक उत्साहित बनेका छन्, मौसम अनुकूल भएमा आलु खेतीबाट स्थानीयको आयआर्जनमा टेवा पुग्नेछ’ थापाले भने ।
गाउँपालिकाले चालु आर्थिक वर्षमा आलुपकेट कार्यक्रमको लागि १२ लाख बजेट विनियोजन गरेको छ । सो बजेटबाट मरेनी र मराङमा बाँझो जमिनमा खेती विस्तार, मिनीटिलर हलो र अन्य कृषि सामग्री खरिदमा सहयोग गरिने कृषि शाखाले जनाएको छ ।
