म्याग्दी, १५ फागुन– जिल्लाको बेनी नगरपालिका वडा नम्बर ४ तातोपानी म्याग्दी नदीको असला माछाको स्वादका पारखीहरूका लागि नयाँ गन्तव्य बनेको छ ।
असला माछाको स्वाद लिन देशका विभिन्न ठाउँबाट पाहुना आउन थालेका तातोपानीको थकाली होटलकी सञ्चालक मना तुलाचनले बताए । ‘यसअघि तातोपानीमा डुबेर उपचार गराउन आउने बिरामीलाई पोषिलो खुराकका रुपमा प्रयोग हुने असला माछाको स्वाद लिन पछिल्लो समय टाढा–टाढाबाट पाहुना आउनुहुन्छ’ तुलाचनले भने ।
बेनीबाट ८ किलोमिटर टाढा रहेको तातोपानी जोड्ने सडक कालोपत्रे भएपछि कुण्डमा स्नान गर्ने र असला माछाका पारखीको गन्तव्य बनेको हो । देशका विभिन्न ठाउँका पाहुना माछाको स्वाद लिन आउने गरेको होटल व्यवसायी पदम बानियाँले बताए ।
उहाँका अनुसार मुस्ताङ जाने र फर्कने क्रममा तातोपानी स्नान गर्न आउँछन् । ‘स्वादिलो हुने भएकाले तातोपानीमा स्नान गरेपछि बिरामीले माछालाई पौष्टिक आहारका रूपमा खाने गर्दथे’ बानियाँले भने, ‘पछिल्लो समय तातोपानी घुम्न आउने पर्यटकले स्नान गरेपछि ताजा माछाको सुप बनाएर खाने र फ्राइ गरेर कोसेली लिएर फर्कने गरेका छन् ।’
म्याग्दी नदीको किनारमा रहेका बजार दरबाङ र बाबियाचौर क्षेत्रबाट समेत माछा मारेर व्यापारीले बिक्रीका लागि तातोपानीसम्म ल्याउने गरेका छन् । ताजा माछाप्रति केजी १ हजार पाँच सय र प्रतिप्लेट माछा चार सयदेखि पाँच सयमा बिक्री हुँदै आएको छ ।
