म्याग्दी, १८ फागुन– जिल्लाको धवलागिरि गाउँपालिकाको बुल र मरेनीमा आलुको कृषि उत्पादन विकास कार्यक्रम सुरु भएको छ । कार्यक्रममार्फत दुई ठाउँका ५८ घरधुरी कृषकले एक सय १४ रोपनी बारीमा आलुखेती गरेका छन् ।
व्यावसायिक आलुखेती विस्तार, उत्पादन, प्रविधिमा सहयोग, आयआर्जन वृद्धि र बजारीकरण गर्ने उद्देश्यले गाउँपालिकाको कृषि शाखाले बुल र मरेनीमा कार्यक्रम सञ्चालन गरिएको शाखाका प्रमुख आश्विन खत्रीले जानकारी दिए ।
कृषकलाई उपकरण, बीउ, विषादी र बजारीकरणमा ५० प्रतिशत अनुदानको सुविधा छ । गाउँपालिकाको लगनशील बहुउद्देश्यीय समूह र बुलझर्मका कृषि जडीबुटी तथा पशुपंक्षी कृषक समूहलाई चालु वर्षमा ६÷६ लाख अनुदान दिइने शाखा प्रमुख खत्रीले बताए ।
आठवटा मिनिटेलर हलो माग गरेका समूहले १२ हजार किलोग्राम बीउ आलु रोपेका छन् । कार्यक्रममार्फत मरेनीमा १८ घरधुरीले २० वर्षदेखि बाँझो रहेको जग्गामा आलुखेती विस्तार गरेका छन् भने बुलका ४० घरधुरीले व्यक्तिगत जग्गामा आलुखेती गरेका छन् ।
एक महिनादेखि बाँझो जग्गाको झाडी फँडानी गरी आलु लगाइएको लगनशील कृषक समूहका अध्यक्ष गौसरा विकले बताइन् । समूहले मरेनीसँगै पैरेनी र लमसुङमा थप एक सय रोपनीमा आलु लगाउने तयारी गरेको जनाएको छ ।
